Aaldert Oosterhuis nimt zien programma Veur de Preek op in zien thuusstudio. Foto: Gerrit Boer
De rubriek Hier kom ik weg is een samenwarking met het Huus van de Taol en giet over Drenten en heur verhalen. Aaldert Oosterhuis is prissentator en verslaggever bij RTV Drenthe.
25 jaor leden begund’e as weerman op TV Drenthe. „Mien zus har een oproep zien op teletekst en zij vun het net wat veur mij. Ik heb altied een bovengemiddelde interesse in het weer had”, vertelt Aaldert Oosterhuis (63) in zien tot radiostudio umbouwde schuur naost zien hoes op Smalbroek bij Beilen.
Liever hen de tandarts
De boerenzeun - geboren en opgruid op Smalbroek - is dan al jaoren warkzaam bij een bedrief in de agrarische sector in Börk. „Ik verwachtte der niks van, maor een keer zu’n screentest doen, leek mij wel mooi. Der waren zestig anmeldings binnenkommen. Niet veul later weur ik beld: ze wolden mij wel hebben.”
Hier kom ik weg
As het nao twie jaor stopt, belt de umroep al gauw weer of e op de radio een prissentator vervangen kan. „Dat mus geliek live. Ik herinner mij da’k liever hen de tandarts gung, haha. Maor de technicus sprak de memorabele woorden: ‘Het naodiel van live is: het kan niet weer over. Maor het veurdiel van live is: het kan niet weer over’. Met aandere woorden: het is een vluchtig medium en het komp allemaol wel goed.”
Veur de preek
Oosterhuis is ien van de vertegenwoordigers van het Drèentse geluud op de zender. Al gauw prissenteert e ’s weekends meerdere programma’s. Het wark past hum as een jas. In 2006 komp e in vaste dienst bij RTV Drenthe. Deurdeweeks giet e het ochtendprogramma De Brink prissenteren en ’s weekends döt e ’s zaoterdags Tussen stoet en koffie en ’s zundags Veur de Preek.
Dat leste programma maakt e nou nog. „Ik nim dat alle weken in mien thuusstudiogie op. Het giet um kerkmuziek. Wa’k daormet heb? Het is de klank van het örgel, aj een goed örgel heurt in een kerk vol volk en dat zingt tegeliek, dat hef wat!
Zölf is e vanof zien 17e organist en zingt e bij kamerkoor Magnificat in Emmen. Veur de Preek past dus hielemaol in zien straotie. Dat geldt ok wal veur Op Tjak, de Drèentstaolige radiorubriek die deurdeweeks veer keer per dag te heuren is. Oosterhuis mak hum sinds 2018, eerst drei dagen in de week en nou nog twie. Tussendeur nimt e het weerbericht veur tv op.
‘Het grote Drèentse gevuul’
Hij döt ok aandere tv-prissentatieklussen, zoas de streektaolquiz Loos. Alles altied in het Drèents. „Oeteindelijk bin ik daor ok veur annummen.” Op Tjak giet vaak over luchtige actuele underwarpen; Oosterhuis red er de hiele provincie veur deur. ,,Ik spreek geregeld nei-Drenten of mèensen die hier niet woont, maor ze begriept mij allemaol. Iederien kan Drèents verstaon, het is gien Chinees.”
Aaldert Oosterhuis veur zien kast met kerkmuziek. Foto: Gerrit Boer
‘Drent dus Drèents’ stiet in zien profiel op X (Twitter). „Daor blek veur mij de vanzölfsprekendheid oet. Dat is het tegenwoordig niet meer zo en dat kuj mèensen ok niet kwaolijk nimmen. Ie kunt de taol wel leren, maor as men de noodzaak niet zöt, gebeurt het niet.”
„Het grote Drèentse gevuul verdwient zo langzamerhand, dat gevuul daj hebt aj aandere Drenten spreekt. Dat he’k bij Op Tjak ok: een gesprek met iene die plat prat, is geliek hiel aans as met iene die het niet kan”, vertelt e wieder. „Het is zoas het is, maar het is ok jammer, want eigenlijk gooit wij met mekaar een cultuurschat van doezenden jaoren old in een paar decennia vort.”
