Bea Kortwijk: 'Ik wil gewoon Bea wezen, niet Bea van de Appie' Foto: Boudewijn Benting
De rubriek Hier kom ik weg is een samenwarking met het Huus van de Taol en giet over Drenten en heur verhalen. Undernimmer Bea Kortwijk hef met heur kinder winkels in Slien en op Nei-Amsterdam.
‘Spiegelen is awesome’ en ‘Ik zorg voor brood op de plank’; der hangt een hiel koppel tegelties an de muur bij heur kantoor boven supermarkt Albert Heijn in Slien. Bea Kortwijk (61) lacht um sommige kwinkslagen die dertussen zit. „Al oeze metwarkers mugt opschrieven wat heur inbreng is in het bedrief.”
Tegenwind
‘Herinner dat een vliegtuig opstijgt tegen de wind in, niet met de wind mee’ hef heur dochter Susan opschreven. Zij nimt, samen met Bea’s zeun Bas, het bedrief Klaver-Kortwijk zo zachiesan over. De spreuk is van toepassing op het gezin. As Bea’s man Giel Klaver in 1999 unverwacht oet de tied komt, bint de kinder 5 en 8 jaor. Ze staot op het punt heur kleine supermarkt in Slien te verruilen veur een grotere, die dan nog bouwd worden möt.
Het verdriet is groot, maor Bea zet deur. „Wat mij de kracht gaf? De kinder. Ik dacht: ze moet vertrouwen kunnen op mij, dat alles wel deurgiet. Het was een grote stap, maar wat har der kunnen gebeuren dat nog arger was as oes grote verlies?”
Hier kom ik weg
Heur kinder gruit op in de winkel, net zoas ze zölf grootkommen is in de supermarkt van heur olders op Veenoord. Bea en heur drei zussen helpt vaak met. Zölf zöt ze het undernimmerschap eerst niet zitten. Dat veraandert as ze an het wark giet bij een collega-undernimmer van heur olders. „De umgang met mensen vund ik prachtig, net as commercieel denken en acties opbouwen in de winkel.”
‘Ik denk in kansen’
„Tussen mien mensen op de vloer wezen, is het mooiste wat der is. Dat doe ik nou veul minder, zo giet dat, maar ik mis het wel ies. Ik vund het heerlijk!” Ze straalt. „Je wark is miesttieds hetzölfde, maar je moet der een feessie van maken, samen met collega’s en klanten zörgen veur een leuke sfeer.”
Tegenover de winkel hef Bea ‘Klaver vier’ opend, een winkelpand met under andere een drogist en vestiging van Icare. De naam verwes naor Giel en de achternaam van heur kinder. Heur vroggere hoes veur de supermarkt is umbouwd tot slieterij en lunchroom Het Veurhuus. Bea: „Ik bin een optimistisch mens en denk in kansen. Ik wil dat Slien verkoopkrachtig bleef. In veul dorpen giet alles weg. Dat möt hier niet gebeuren. Oeze Albert Heijn hef tegenwoordig een regiofunctie.”
Een diel van het Albert Heijn-pand in Slien; hier hef Bea de eerst jaoren met heur kinder woond. Foto: DvhN
‘Gewoon Bea’
Zölf is ze wal vortgaon. „Wonen bij de winkel was ideaal toen de kinder klein waren. Later bew naor Emmen verhuusd. Ik was afstand neudig. Aj bij de winkel woont, ziej ok alles. In mien vrije tied wil ik gewoon Bea wezen, niet Bea van de Appie. Ik bin veul bezig met keramiek en a’k tussendeur even de honden uutlaten wil, loop ik met dezölfde kleren het veld in. Zo zul ik in Slien niet over straot gaon.”
Ze warkt nog drei mörgens. Wieder genöt ze van heur drei kleinkinder en reist zij en heur partner Geert veul. Het bedrief Klaver-Kortwijk is in 2017 oetbreid met een twiede Albert Heijn-supermarkt op Nei-Amsterdam en telt nou twiehonderd metwarkers. „Zij bint oeze kracht en moet het Klaver-Kortwijk-gevuul hebben. Wat dat is? Je kunt het niet allennig. Samen de scholders derunder zetten, dat is hiel belangriek.”
