Sandra Katerberg oet Diphoorn: 'Iederien die in het underwies warkt, is een wereldverbeteraar' | Hier kom ik weg

Ze komp van Emmer-Compas, maor dat heur ie niet aj met Sandra Katerberg een gesprek voert. „Ik praot een mengelmoessie”, zeg ze an taofel op de boerderij in Diphoorn. Nao zo’n 23 jaor vuult ze zuch een echte Diphoriger en hef ze het Drèents van heur man Reind een beetie overnummen. „Maor a’k op Emmer-Compas ben en de taol daor heur, he’k wel altied hiel stark het gevuul van ‘Hier kom ik weg’. Dan knauw ik ok lekker met.”

Katerberg (49) wet as wichie ien ding zeker: ze wil gien juf worden, zoas heur mam. Lachend: „En wat ben ik worden..?” Nao de pabo giet ze an de slag op twei schoelen in Bunermond waor ze ofwisselnd de groepen 2 tot en met 8 les gef.

Later wordt ze intern begeleider op een schoel op Emmer-Compas en giet ze ok de directeur vervangen. „Dat vun ik een nóg mooiere baan. Ik had niet per se die ambitie; het kwam op mien pad.”

Ze is daornao under andere negen jaor directeur van christelijke schoel Rehoboth in Gies. „Daor ha’k het arg naor de zin, maor soms dacht ik ok: gebeurt hier nog ies wat? Het verschil met Bunermond en Emmer-Compas was groot. Daor waren veul meer olders scheiden en was vaker trammelant. Veur een underwiesmens is dat wat uutdagender.”

Katerberg pleit veur het samenvoegen van christelijke en openbare schoelen. In Gies is dat tot heur spiet niet lukt, waordeur ze allebei te klein waren um te blieven bestaon. „Ik vin het zo jammer dat in het neie mfc op Skonnerd ok weer twie schoelen komt, in plaots van dat ze samengaot.”

Obs De Akker en cbs De Fontein in Slien staot ok op de nominatie veur neibouw, zeg ze. „Slien kreg over een antal jaor ien grote neie schoel wat mij betreft. Zo niet, dan gao ik der persoonlijk veurliggen.” Schoelen kunt mekaar verstarken, vindt Katerberg. „Alle energie ze stopt in het benaodrukken van de verschillen, giet niet naor de kinder. Zunde.”

Tegenwoordig warkt ze nog ien dag per week veur underwiesstichting Fiers en daornaost veur Zorg om Boer en Tuinder (ZOB) en het platform Taboer. Taboer zet zuch in veur de mentale gezondheid van boeren. „Hiel belangriek. Het taboe op praoten over mentale problemen is der nog altied en wij wilt boeren juust ansporen dat te gaon doen.”

Is ze zölf eigenlijk boerin? „Da’s een gewetensvraog. Ik heb wel methölpen en ken de ins en outs van oes melkveebedrief, maor het is niet mien passie, zoas van Reind en oeze zeun. Dat is het underwies.”

„Iederien die in het underwies warkt, is een wereldverbeteraar, want van onderop kuw daor de goeie dingen deurgeven”, vertelt ze wieder. „As CDA-raodslid in Coevern is opkommen veur de jeugd ok ien van mien speerpunten.”

Ze döt in die functie ok heur best um de streektaol under de aandacht te brengen. Die komp heur vaak genog van pas. „Ik heb het wel metmaakt in gesprekken met olders op schoel, bijveurbeeld op Emmer-Compas. As ze zuch zörgen maakt, praot ze graag in heur eigen taol. ‘Met die kin ik praoten, want doe begripst mie’, zeden ze dan. As mèensen contact met mij as raodslid zuukt um wat te bespreken, giet het net zo. Het warkt verbindend.”