Schoeldirecteur Egbert Schepers: 'Een kind möt elke dag zien worden' | Hier kom ik weg

Koj bij Egbert Schepers op de boerderij in Old Aalden dan het de kolossale hond Evert je blaffend welkom. „Wij nuumt hum oes Evert”, grijnst Schepers (64), zoas e zölf vrogger thuus in Hesseln ‘oes Egbert’ nuumt weur en deur vrienden ok, veur de gein.

Hij hef een mooie jeugd had in Hesseln en har allerlei bijbaanties: van metwarker in discotheek De Waog en melkmonsternimmer bij boeren tot postbezörger en timmerman; zien pap leerde hum de kneepies van dat vak. „Ik bin een bouwer. Wij bint hier in 1994 kommen wonen en hebt het hoes, met hulp van mien va en schoonva, zölf verbouwd.”

In de jaoren 80 wordt e meester op basisschoel Aelder Hooghe, de veurloper van obs De Anwende in Aalden. Het underwies hef zien hart steulen. „Ik vin het hiel belangriek daj kinder elke dag het gevuul geven kunt dat ze derbij heurt en ze zuch ontwikkeln kunt.”

Dartig jaor leden wordt obs De Smeltkroes opend in het asielzukerscentrum, eerst as underdiel van de Aelder Hooghe. Schepers giet het neikommersunderwies coördineren. „Der mus lesmateriaal kommen en meubilair; geld was der niet. Daor wol ik mij veur inzetten. Bouwen is mien ding ja.”

De mieste kinder zit umdebij een jaor op De Smeltkroes veur ze deurstroomt naor ien van de aandere basisschoelen in Aalden. „In het begun was daor wat weerstand. Sommige olders mienden dat heur kinder minder andacht kriegen zulden in de klas. Wij hebt de veurdielen oetlegd: kinder kunt van mekaar leren.”

In 2000 wordt Schepers directeur van De Anwende, die dan verhoest naor een nei gebouw. Ok daor kan e deur de jaoren hen aordig bouwen, want de schoel wordt aal groter. Tussendeur is e, naost zien wark op De Smeltkroes, ok körte perioden directeur van aandere schoelen in de umgeving.

Daornaost hef Schepers altied een drok leven had, met zien gezin met drei dochters, muziek maken en de organisatie van Folk veur Volk. Het folkfestival, dat umdebij doezend man publiek trekt, wordt al dartig jaor holden bij hum en zien vrouw Hennie in de hof.

As e in 2019 een herseninfarct kreg, is dat een tieken um het rustiger an te gaon doen. „’Dat bint jao haost drei levens in ien’, zee de revalidatiearts toen ik vertelde wa’k allemaol dee.”

Nou is e allent directeur van De Smeltkroes. „Het neikommersunderwies is net een virus: aj der ienmaol met besmet bint, koj der niet meer of”, lacht e. Um kinder die soms allerlei ellende metmaakt hebt, te zien gruien, gef hum veul voldoening. „Een kind möt elke dag zien worden bij de schoeldeur, dat is zó belangriek.”

Tegenwoordig speult ok de eigen taol van de kinder een rol op schoel. „Wij leert ze 3500 Nederlandse woordties, maor heur thuustaol gebruuk wij ok. Daor bint boekies en opdrachten veur. Wij betrekt de olders der ok bij. Want as een kind bijveurbeeld femilie belt, doet ze dat niet in het Nederlands. En ok emoties uten doej in je eigen taol. Zo giet mij dat met het Drèents, mien thuustaol. Oeze grootste gemiene deler is daj altied teruggriept op je thuustaol as het op gevuul ankomp.”