Wilma de Jong oet Wisp: 'Iederien in het dörp helpt met bij de kerstmarkt; wij doet het met mekaar' | Hier kom ik weg

Ze is geboren en opgruid in Wisp. En toch, as Wilma de Jong-Hagting - nao negen jaor in Friesland woond en warkt te hebben - in 1999 met man in heur olderlijk hoes wonen giet, vuult heur man Mark zuch eerder thuus as zij. „Ik was der vanuut gaon dat het dörp nog hetzölfde was as toen ik vort gung, maor hiel veul mèensen woonden der niet meer. Ik kende haost niemand. Toen ik in het bestuur van de Dorpsvereniging Wezup kwam, was het klaor; toen leerde ik iederien weer kennen”, zeg ze.

De Jong (55) gruit op in een boerderij middenin het dörp. Heur zörgeloze jeugd is op heur 17e veurbij as heur pap unverwacht oet de tied komp. Kört daornao verhoest ze hen Arnhem um de secretaresseopleiding Schoevers te gaon doen.

Vrijwiligerswark löp as een rooie draod deur heur leven. Ienmaol weerum oet Friesland zit ze niet allent in het bestuur van de dörpsverieniging, ok zet ze zuch vrijwillig in veur de ANWB, de jaorlijks drukbezöchte kerstmarkt in het dörp, de EHBO-verieniging in Sweel en de survivalrun in Börk. „Mien pap zat ok in allerlei besturen. Nou bin ik zölf actief. Volgens mij giet dat vanzölf aj het van huus uut metkriegt; het zit in je DNA.”

Het begunde eigenlijk al in heur pubertied: as tiener zat ze in het eerste bestuur van de Werkgroep Jongerendag, de organisator van Sweelpop. „Wij organiseerden optredens in dorpshuus De Spil in Sweel. Klein Orkest hew under andere had en Jan Rot. Ok heulden we biezundere recordpogingen, zoas 22 kilometer krupen en wc-pot zitten.”

Betaald wark döt ze twaalf jaor lang bij bedrieven in Gorrediek, tot ze an de slag kan as secretaresse bij de Brede Overleggroep Kleine Dorpen (BOKD). Dat past heur geweldig. „Vanuut de Dorpsvereniging Wezup kende ik de organisatie al en ok veul aandere dörpsverienigingen. Ik kun opiens veul vaker Drèents praoten.”

„Ik vuul mij thuus deur de streektaol”, vertelt ze wieder. „Ik wark nou alweer tien jaor in Zuudlaoren bij Zorgbelang Drenthe en a’k cliënten an de tillefoon heb die Drèents praot, dan gao ik dat ok doen. Dan mark ie echt verschil; mèensen praot veul makkelijker.”

Op de taofel staot knieperties. „Een paar week veur de kerstmarkt wordt hier in Wisp alle dagen in groepies knieperties bakt um op de markt te verkopen. Dat doew bij iene in de schuur: de ien drèeit deegballegies en de aandern bakt ze in de iezers tot knieperties. Iederien helpt met.” Doezenden knieperties wordt der alle jaoren verkocht. „Der bint mèensen die speciaal hen de kerstmarkt komt veur de knieperties.”

Het hiele dörp is tiedens de kerstmarkt in touw. „Iederien helpt, neie inwoners ok. Ie zulden het naoberschap numen kunnen. Wij doet het echt met mekaar.”

De Jong hef al in twee commissies zeten. Dit jaor is de markt op 8, 9 en 10 december en stiet ze ien aovend in de cateringkraom en is ze ien dag gastvrouw. Ze wil nog even terugkommen op het naoberschap: „Het umzien naor mekaar was der vrogger al en dat is der nog. Toen mien pap overleed, hölpen buren oes, zunder daw derum vreugen. En ok nou staow in Wisp veur mekaar klaor as der wat is. De tieden veraandert en het naoberschap veraandert met.”