Undernimmer Jan Bloemerts oet Lhee 'Ik heb het butenleven weer evunden' | Hier kom ik weg

„Giet dat goed met oen lakschoenties?” Jan Bloemerts wes lachend naor de witte sneakers van de verslaggever as hij heur rondleidt. Camperpark Stee in Lhee, net oetbreid van 60 naor 84 plekken, lig der spic en span bij en is goed bezet op dizze naozummerdag. Maor even wieder, bij de schuren van het veurmalige boerenbedrief, moet ze deur het zaand. Daor wordt nei straotwark inlegd.

Van boer naor recratie-undernimmer in een paar jaor tied; een hiele umslag en toch was Bloemerts (52) niet hielemaol vrömd in de wereld van het toerisme. „Mien olders hadden een boerderij in Lhee, maor daorbij ok logies en ontbijt, de veurloper van een Bed & Breakfast. Dus der was vrogger altied vrömd volk op de dam.”

„Het toerisme stun toen nog in de kienderschoenen hier”, vertelt e wieder. Nou is de gemiente Westerveld, veural Dwingel en umgeving, ’s zommers goed veur tiendoezenden toeristen. „Die reuring, dat heurt erbij hier”, zeg Bloemerts, die ok veurzitter is van Dorpsbelangen Dwingeloo.

Hij prat plat as e heurt dat zien gesprekspartner dat ok döt. „Dreints was vrogger bij oens in huus de voertaol. Met oens volk preuten mien zus en ik plat, maor as der gasten bij waren, dan preuten wij Nederlands. Zo doe ik het nog as der meinsen bij een gesprek bent die gien Dreints praot. Ik wil dat iederiene mekaar verstiet.”

Vanof zien tienerjaoren wet Bloemerts dat e de boerderij overnimmen wil. Hij breidt het bedrief an de raand van Lhee oet. „Het butenleven trök mij an. Maor ik heb der ok altied bestuurstaken bij edaone. Ik vien koenen hartstikke mooi, maor ik wol der wel wat bij doen. Aj altied op je bedrief bint, kan je wereldtie ok wat klein worden.”

Maor deur de jaoren hen kreg e as boer aal meer administratieve taken en op een bepaald moment warkt e 2,5 dag veur LTO, waor het aal meer over stikstof giet. Bloemerts vergadert wat of. „Mien motivatie weur aal minder.”

As e in 2017 ziek wordt, giet het roer um. Hij stopt met de boerderij. „In het begun was mien concentratie slecht, maor mien gezichtsveld is ok blievend anetast, waordeur ik minder overzicht heb. A’k een kudde koenen veur mij heb, zie ik een deel van de dieren niet. De boerderij, dat kun niet meer.”

In april 2020 opent hij en zien vrouw Sandra camperpark Stee in Lhee. Het löp geliek as een tierelier. „Wij hebt onwies veule veurdeel ehad van de coronaperiode, want campings waren eerst dicht en vliegen kun niet, maor met de camper op pad kun wél.”

Hiel soms mist e het boer wezen. „A’k boeren zie grösmeeien of -schudden in het veurjaor, wil ik zo metdoen. Maor a’k dan deink an al die regelgeving, dan niet. Het butenleven wa’k miste, he’k nou weer evunden. En de streektaol komp ok van pas. Op oes camperpark heur ie alle dialecten. A’k marke dat iene plat prat, doe ik dat ok. Het warkt drempelverlagend. Meinsen waardeert het ok. Ie kunt vaak makkelijker oen gevuul uten in oen eigen taol. Soms bi’j maor een paar woorden neudig. Het gef een ons-kent-ons-gevuul.”