Zanger Harmen Boels oet Skonnerd: 'Ik kan nou mien eigen kop volgen' | Hier kom ik weg

Lang dacht Harmen Boels dat e boer worden zul, zoas zien pap. Op Odoornerveen, waor e opgruid is. Maor het bedrief har gien toekomst. „Achterof denk ik dat het goed is zo, maar vrogger vun ik het jammer”, zeg Boels (52) in het rijgieshoes op Skonnerd, waor e met zien vriendin woont.

„Wij bint op zuuk naar een aander huus. Ik kom van de vlakte en wil graag weer um mien eigen huus hen lopen kunnen, zoas ik dat wend ben van de boerderij.” Hij zul wel graag weer op Odoornerveen wonen willen. „Of in elk geval hier argens in de umgeving van een kanaal. Dat trekt toch.”

Vief jaor lang was Boels de leadzanger van de Drèentstaolige rootsband Aosem, die eind 2022 stopte. Veul mèensen kent hum daorvan, maor hij mak al veul langer muziek. „Vrogger op de boerderij waren we al met muziek bezig. Mien pap zung bij verschillende koren en mien mam har een banjo, waar mien breur en op ik zaten te pingeln”, lacht e.

Nao blokfluitles giet e bij de muziek in buurdörp Oring. „Ik heb bugel en cornet speuld. Rond mien 15^e was ik het marcheren op straat zat en wol ik graag gitaar speulen. Umdat ik veul methölp op de boerderij, kreeg ik van mien olders een elektrische.” Hij giet op les en speult vanof dat moment in allerlei bandties, ok geregeld samen met zien breur Hans.

Boels is nao Aosem nou veur humzölf an de gang. Eerder dit jaor kwam zien eerste single Ölie op het vuur oet en later dizze maond de tweede: Stien veur stien. „Dat nummer giet over een tied waarin ik alles kwietraakt ben. Later heb ik mien leven vanneis opbouwen moeten. Zo’n tied met ellende gef ok veul inspiratie.”

„In de coronatied kunden we met Aosem niet optreden, maar heb ik wel hiel veul liedties schreven. Daarna kwam de band niet meer echt van de grond. De prik was uut de cola, het warkte niet meer”, blikt Boels terug. „Ik wus al hiel snel da’k deur wol met de muziek. Ik wil nou doen wa’k zölf mooi vind en kan mien eigen kop volgen. Daarnaast zing ik in de neie coverband Eastman. Wij speult nummers van Bruce Springsteen enzo.”

Veur humzölf blef e, net as met Aosem, zingen in de streektaol en mak e het liefst vlotte gitaarmuziek. „Ik vin het mooi um nummers in het Drèents te schrieven en te zingen. Het is hiel puur en eigen. Mien teksten bent vaak een beetie bluesy en ik hol dervan daj der as luusteraar verschillende kaanten met op kunt. Toen mien breur Stien veur stien heurde, zee e: ‘Dat verhaal van pa en ma!’ Ik dacht: as ie dat er in heurt, ok prima.”

„Ik gebruuk ok best wat Nederlandse woorden in mien nummers. Ik zing zoas ik zölf praat. Sommige mèensen vindt het niet Drèents genog, maar ik hol niet van al die taalregelties. Ik zeg wel ies: het is veur mij gien streektaal, maar een spreektaal. Met aa in plaats van ao inderdaad. Zo praat ik.”