Kapper en acteur Josh Hassing oet Oring: 'Toen ik het Scapino Ballet zag, dacht ik: dat wil ik ok!' | Hier kom ik weg

„Ik word miesttieds cast veur rollen van stoere kerels met een grote bek. In Fanfare op de Hondsrug speul ik een autistische en ontzettend homofiele dirigent. Dat is zo aans as aans, dat vind ik een mooie uutdaging.” Josh Hassing gnes. Dunderdagaovend giet het humoristische theaterspektakel, baseerd op de beroemde film van Bert Haanstra, maor met een hiel eigen Gasselter sausie, in première.

Hassing (63) hef jaorenlang de Musicalgroep Odoorn leid. De succesvolle stukken Een Ander Achterhuis en De Opgejaagden hef e zölf schreven. „Nou wij stopt bennen, mark ik dat ik vaker vraogd word um her en der in met te speulen. Ik heb metdaon an So Many Roads, het theaterstuk over Harry Muskee in 2021 en Het ontzet van Coevorden eind 2022. Prachtig um te doen!”

Hij is geboren en opgruid op Klazienaveen. As kind mag e geern tieken en zit e op turnen. „Toen we in de viefde klas van de legere schoel naor een optreden van het Scapino Ballet gungen, wus ik: dat wil ik ok. Het daansen vund ik prachtig um te zien.”

As de meester hum later vrag wat e worden wil en Hassing zeg wat zien dreum is, kreg e as reactie: ‘Jij komt uit Klazienaveen. Dat kun jij niet’. „En wat de meester zee was de waorheid, dus daor bleef het bij. Later dacht ik: wat een klootzak. Het is natuurlijk bullshit dat het uutmak waor aj weg kommen.”

As der een advertentie in de kraant stiet dat der daansers zöcht wordt veur het showballet van Penney de Jager, beslöt e toch een brief te schrieven. „Ik har ervaring bij een Joegoslavische volksdansgroep en ik heb derin zet da’k goed uut de voeten kun op de daansvloer in de discotheek. Een paar dagen later belde ze of ik auditie doen wol.”

Een week daornao zit Josh Hassing van Klazienaveen in het showballet en treedt e op in under meer tv-shows van de bekende prissentator Willem Ruis. Umdat het daansen niet goed verdient, giet e net as zien vriend Richard Saptenno de kappersopleiding doen en bij verscheiden salons an de gang. Nao drie a veer jaor showballet giet Hassing in Emmen aerobics- en jazzballetles geven. In 1991 verhoest het stel hen Oring, waor ze Saphas Kappers opent.

Drèents is zien eerste taol. „Toen ik hen de legere schoel gung, mus ik een neie taol leren. Ik har haost nooit Nederlands heurd. Tv was der toen nog amper.” Dat e nou in Fanfare op de Hondsrug ok plat praoten kan, vindt e allent maor mooi. Met zien familie en aandere bekenden van Klazienaveen prat e nog altied plat. „A’k opiens Nederlands zul gaon praoten, zulden ze denken da’k wat mankeer. Met Drèentstaolige klanten in de salon doe’k het ok. Aj dan Nederlands praoten, creëer ie juust ofstand.”

In 2025 brengt e De Opgejaagden, zien stuk over het underdukershol bij Valthe vanneis op de plaanken. „Dan is het 80 jaor bevrijding, dat is een mooie gelegenheid. Ik gao het stuk wal wat herschrieven. Maor daorvéur gao’k eerst een grote musical veur basisschoel De Weiert hier in het dörp schrieven. Die wordt over een jaor opvoerd deur alle 200 leerlingen.”