Motorbegeleider bij het EK wielrennen Rieks Poelman uut Assen: 'Alles draait um de veiligheid' | Hier kom ik weg

„Doe moutst gien bucketlist maoken, maor op mien leeftied bliede wezen met wat veur moois der nog komp”, zeg de 74-jaorige Rieks Poelman an de keukentaofel in Assen. Hij kan ’t zeggen. In 2011 weur de geboren Gietervener al benuumd tot Lid in de Orde van Oranje-Nassau veur zien inzet bij verscheiden activiteiten.

Poelman zit nog aal niet stil en is nou drok in de weer met de veurbereidings veur de motorbegeleiding van het Europees Kampioenschap wielrennen dat van 20 tot en met 24 september in Drenthe holden wordt.

Samen met Chris Gras richtte hij in 2017 MBT Assen op. „Wie hebben 130 leden en begeleiden deur het huile laand wielerkoersen en fietstoertochten”, vertelt de Assenaar. Leden warven veur zien team huuft de veurzitter nooit. „Onze mensen raoken in gesprek over heur warkzaomheden met bekenden.” Die bellen op heur beurt met Poelman, kommen kieken bij bijienkomsten in het Wielerhome in Assen en rieden ies een dag met. „Doe moutst bie ons verantwoordelijk wezen. Mensen die vol bravoure rieden, kunnen wie der niet bie hebben. Alles draait um de veiligheid.”

Daorum kriegen de leden van het motorbegeleidingteam dudelijke instructies en moeten ze goed kunnen samenwarken. „Bie fietstoertochten rieden wie dynamisch met. Dat betaikent dat wie op hetzölfde parcours as de renners rieden”, leg Poelman uut. „Der gaon een stuk of vaier van ons veurop en ain ridt der achteran. Die zetten alle ziedwegen stil, zodat de fietsers ongestoord deur kunnen.”

De mieste mèensen gunnen mekaor heur plezier, maor niet alle verkeersdeelnemers laoten zuch an de kaant sturen. „Lest wol ain met een trekker inrieden op onze mensen. Daor maokt de plietsie wark van.”

De motorliefhebber löp de keuken uut en komp weer met een dikke map. „Veur elk evenement dat wij begeleiden, maok ik een draaiboek. Dizze is veur het EK. Hierin staon bijveurbeeld de parcoursen en de genummerde posten”, leg e uut. „Elke verkeersregelaor hef zien aigen nummer, post en taokinstructie. Bie elke post staon de verwachte deurkomsttieden bie verschillende snelheden vermeld.”

Tiedens het EK ridt de laandelijke plietsie dynamisch met in de koers en rieden leden van het motorbegeleidingteam buten het parcours um naor heur volgende post. Alle motoren van het motorbegeleidingsteam hebben een GPS-systeem en staon in verbinding met heur eigen meldkamer. „Wie hebben allemaol de route in een navigatiesysteem staon en holden via de portofoon contact met mekaor.”

Poelman vindt het donders mooi dat het EK wielrennen in Drenthe holden wordt en döt der met zien team alles an dat het veilig verlöp. Het EK is veur hum slaagd as iederiene hiel over de finish komp. Dat een ongeluk in een klein hoekie zit, hef e lest in een hevige regenbui nog metmaokt. „Ik mos een noodstop maoken en de motor ging op zien kaant. Toen had ik het vleis wel even van de spareribs liggen.” De Assenaar wref over zien ribben. „Maor het gaait wel weer goud heur.”

Stolts laot de organisatorische duzendpoot op de dam zien splinterneie motor zien. „Vieftig kilometer op de teller”, glundert e. Poelman stapt op en start de motor. Zunder bucketlist en met nog hiel wat kilometers te gaon, riedt e de straot uut.