Willem-Jan Hegen oet Gies: ‘Het mooie van een ijssalon is dat mèensen altied vrolijk bint’

„Wie is dat?” Verlegen kröp Jur (3) tegen zien pap an. Hij har die vrouw an de keukentaofel niet verwacht. Willem-Jan Hegen is zoveul meugelk in hoes bij de kinder as Gerlinde drok is in de ijssalon. En aans past de opa’s en oma’s op as Jur, Toon (1) en Luus (5) niet naor de opvang of naor schoel bint.

Op de boerderij an de Dorpsstraat in Gies melkt e samen met zien pap 120 koeien. Daornaost hebt ze nog ongeveer zestig stuks jongvee. „As kind gung ik altied al met mien va met naor de stal en op de trekker. Oeze kinder gaot ok geregeld met mij met. Grote trekkers en machines vindt ze mooi. Dat zit der al vrog in”, lacht e.

Plat praoten hef Hegen altied daon. Hij döt het miesttieds ok tegen de kinder. „Dat giet automatisch.” Hij hef nooit aans weten as dat e boer worden wol. In 2011 kwam e bij zien olders in de maatschap en kört leden hebt Gerlinde en hij het boerenbedrief officieel overnummen.

Hegen is de veerde generatie op het bedrief. „As ien van de kinder het later deurzetten wil, mag dat, as ze niet te veul beren op de weg ziet. Het wordt der tegenwoordig niet leuker op um boer te wezen met al die regels. Wij mucht oeze haanden dichtkniepen daw oeze ijssalon as twiede bedriefstak dernaost hebt.”

Eind 2016 nam het stel ijssalon Talenti over. Het ijs maakt ze van de melk van heur eigen koeien. Gasten kunt, naost genieten van een ijssie of lunch, ok in de stal kieken. ,,Dat vindt ze altied leuk. Het mooie van een ijssalon is dat mèensen altied vrolijk bint en dervan geniet. Wat dat dan wel niet kan doen, hè, zun ijssie.”

Neie smaken bedenkt ze miesttieds met metwarkers. ,,Een wichie bedacht de smaak ‘oma’s cakebeslag’. Dat bew gaon proberen met wafelmix erdeur. Het valt arg in de smaak. Maor wij wisselt ok geregeld. Soms belt mèensen belt of oma’s cakebeslag er is.” Hij lacht weer. „Aans komt ze niet.”

Ze begunden met zeuven metwarkers, tegenwoordig bint het der ningtien, miest jongern. Op drokke dagen springt Hegen bij. ,,Toen we eind meert veur het eerst weer lös gungen nao de winter, was het geliek ontzettend drok. Het was haost gekkenwark, net of der nooit weer een mooie dag kommen zul, haha.”

Undertussen hef Hegen een pieper an de boks, want hij zit ok al ongeveer tien jaor bij de Brandweer Zwinderen. „Wij hebt een gezellige ploeg en as brandweerman kuj ok wat veur een aander doen. Wat het mieste indruk maakt hef? Ongelukken. Het klinkt misschien gek, maor een brand is veur een brandweerman ok wel iets moois. Aj der op tied bij wezen kunt en je kunt der wat an doen, gef dat een goed gevuul.”

„Sommige ongelukken bint hiel naor, zoas het vliegtuugongeluk lest bij Nieuwlande, waorbij twee mannen umkwamen”, zeg e. „Een stalbraand waorbij kalver ofmaakt worden mussen, hef indruk op mij maakt. Dat komp dichterbij umdaj melkveeholder bint. Nao een oetruk praot wij altied nao op de kazerne. Deur te bespreken hoe iedereen het hef beleefd, kuj het verwarken. Dat is hiel goed.”