Katrien Eggens oet Bunen: ‘Ik zörg derveur dat mèensen rust in de kop kriegt’

„Het giet erum daw met mekaar het Drèents anfietert. Dat ik niet meer in Aa en Hunze woon, is niet zo spannend”, zeg Katrien Eggens (57) an de grote taofel middenin heur woonkamer. Nao 36 jaor in Grol bint heur man Roelof en zij veurig jaor hen Bunen verhoesd. „Mien netwark zit daor nog wel.”

Veurig jaor zommer hef ze Jan Hartlief oet Gieten opvolgd as streektaolambassadeur. „Ik heb ies een Drenthe-cursus van het Huus van de Taol bij hum daon, um wat meer te weten te kommen over de previncie. Daornao bin ik taolvrijwilliger worden. Toen Jan opvolgd worden mus, dacht ik eerst: ik kom net kieken. Maor ik vun het ok al wat daw gien ambassadeur meer hebben zulden.”

Ze komp oet een undernimmersgezin en gruit op Oringerveen op met twee oldere breurs. Heur pap hef een smederij en een landbouwmechanisatiebedrief. „Der weur wel plat praot bij oes thuus, maor mien pap preut ok vaak Nederlaands, want hij har klaanten die gien Drèents preuten. Bij Roelof in huus preuten ze veul meer Drèents, dus toen ik bij hum kwam, bin ik het ok meer gaon doen.”

Op heur 20e gaot ze samen in Grol wonen. Nao heur eerste baan bij een verzekeringsbedrief in Emmen, giet Eggens an het wark bij de Rabobank in Raol. „In totaal he’k 26 jaor bij de Rabobank zeten. Ik heb meerdere fusies metmaakt en op verschillende locaties warkt. De leste fusie naor Rabobank Assen en Noord-Drenthe he’k as projectmanager begeleid.”

„Intern ben ik nogal ies switcht naor aandere vakgebieden. Ik hol van ofwisseling”, vertelt ze. „De leste jaoren begeleidde ik allerlei projecten. De overgang van de gulden naor de euro bijveurbeeld en de millenniumwissel.” Lachend: „Daw haost bang waren dat de wereld zul vergaon en alles op 1 jannewaori 2000 nul staon zul, haha.”

„Wat ik altied mooi vun, was het warken met mèensen; in gesprek gaon over wat beter kun, dat soort dinger”, giet ze wieder. As ze tien jaor projectmanager west hef, begunt Eggens heur eigen bedrief: ze giet groepstrainingen timemanagement geven bij bedrieven en coacht ok warknimmers ien op ien. „Ik kom uut een undernimmersgezin en het begunde te kriebeln. Toen functie bij de bank opheven weur, dacht ik: nou he’k de kaans.”

Via mond-tot-mond-reclame kreg ze heur trainingsbedrief an de loop. „Timemanagement – nee, daor he’k nog gien Drèents woord veur – giet niet um efficiënter warken, zoas mèensen soms denkt. Ik zörg derveur dat warknimmers rust in de kop kriegt en overzicht in het wark holdt. Waj tegenwoordig veul ziet, is dat mèensen overdag zo keihard an de gang bint en hielemaol leefd wordt deur de waan van de dag dat ze ’s aovends kapot bint. Dat is zunde. Het giet derum: waort besteedt je andacht an en waoran niet.”

As streektaolambassadeur giet ze met heur vrijwilligers in Aa en Hunze het Drèents promoten. „Ik vin het mooi um daor mien stientie an bij te dragen. Ik bin trots op waor ik weg kom en wies met mien taol. In mien wark gebruuk ik het Drèents niet zo veul, al ligt het an de groep die ik train. Lest har ik metwarkers van een installatiebedrief in Assen; ja dan praot wij gewoon plat.”