Streektaolambassadeur Jan Hartlief oet Gieten: 'Het lesgeven zit in mien bloed' | Hier kom ik weg

De bongel met het opschrift Aa en Hunze stiet in de hal in zien hoes in Gieten. „Nog een half jaor en dan geef ik het stokkie over”, zeg Jan Hartlief (72). Een streektaolambassadeur möt bij zien antreden de iekenholten bongel letterlijk oppakken as zien veurganger hum henlegd hef. Zien opvolger is nog niet bekend.

Hartlief hef altied in het underwies warkt. „Toen ik haost met pensioen gung, zag ik in een advertentie dat het Huus van de Taol taoldocenten zöcht um cursussen te geven. Daor he’k mij geliek veur anmeld. Het lesgeven zit toch in mien bloed.”

In 2017 weur e streektaolambassadeur. In die functie möt e in Aa en Hunze het Drèents promoten en, samen met negen vrijwilligers, activiteiten organiseren die de taol under de andacht brengt. Ok is e vraogbaak op streektaolgebied in zien gemiente.

Naost de cursussen gef Hartlief ok körte ‘broescursussen’ an organisaties die heur metwarkers of leden kennismaken laoten wilt met het Drèents. „En volgende maond in de Meertmaond Streektaolmaond gaow weer met vrijwillige veurlezers hen de basisschoelen in Aa en Hunze en diel wij ok het kindertiedschrift Wiesneus oet”, vertelt e.

„Zölf gao’k veurlezen op de drie basisschoelen en de peuterspeulzalen in Gieten. Dat vin’k altied prachtig. Ok de wetholders en burgemister Anno Wietze Hiemstra gaot veurlezen. Met Anno Wietze he’k al even oefend op de oetspraak.”

Wieder levert e alle jaoren met zien taolvrijwilligers een bijdrage an de gemienteraodsvergadering in de ‘Meertmaond’. Ok organiseert ze de Streektaolstried, een pubquiz waorbij het Drèents centraal stiet en waor elkenien oet Aa en Hunze metan doen kan. „Van ’t jaor is het in Ieghaor. Wij hebt alle jaoren zu’n 25 dielnimmende groepen.”

Het helpen bij de opnames van de kerstreclamespot van supermarkt Lidl in 2022 verget Hartlief niet weer. Hij heulp acteur Alex Klaasen, die Drèents praoten mus, maor dat niet kun. „Ik bin twee dagen op de set in Bussum west. Wat een wark zit der in zu’n spottie! A’k nou naor tillevisieprogramma’s kiek, denk ik vaok: hoe lang zult ze hier metan west hebben?”

Hartlief prat zölf niet het Drèents van Gieten, maor van Grol. Hie gruide op in Papenvoort, waor zien olders Café Halfweg hadden. Zien mam zwèeide daor zestig jaor de scepter. Zölf vun e achter de bar warken met een bruloft wal mooi, maor wieder trök de horeca niet.

Drèents was de voertaol in hoes en op schoel ok. „Ik bin van de leste generatie die echt Drèents opvoed is. Toen mien vrouw en ik zölf kinder kregen, weur juust benaodrukt daj ze goed Nederlands leren mussen. Zij kunt het wel. De kleinkinder niet, maor die lees ik wel veur in het Drèents.”

Hartlief hef jaoren warkt op de W.A. van Lieflandschool in Assen. Eerst as mister, later as directeur. De mieste kinder op die schoel hebt een verstandelijk beparking. „Het contact met heur vun ik prachtig. Ze bint zo eerlijk. Mucht ze je dan mucht ze je en hebt ze een hekel an je, dan mark ie het ok.”

Met de leerlingen preut e niet plat, met Drèentse collega’s wel. Lachend: „Veul mèensen bint dat zo gewoon van mij; de eerste keer da’k as streektaolambassadeur Nederlaands preut tegen een nei-Drent was der iene verbaosd da’k dat ok kun.”