De rubriek Hier kom ik weg is een samenwarking met het Huus van de Taol en giet over Drenten en heur verhalen. Hennie Enting oet Assen is roem een jaor streektaolambassadeur in heur gemiente. Taol hef, as dochter van een Drèentse pap en een Friese mam, altied heur interesse had. ,,Ik bin meertaolig opgruid.”
Hennie Enting (63) komp oet het jongste dörp van Drenthe: Witteveen. Een dörp dat in 1924 ontstiet as het veengebied tussen Börk en Aalden ontgunnen wordt. ,,Het is een stukkie veen tussen de zaanddörpen. De mèensen die der in mien jeugd woonden, kwamen overal vort. Ik heurde allerlei Drèentse varianten in het dörp en ok wel Grunnings.”
Heur pap, die boer was, kwam van Oranjedörp en heur mam oet Leeuwarden. ,,Het Drèents uut de buurt van Emmen is mien Drèents. Het lek op dat van Daniël Lohues. Ik zeg bijveurbeeld ‘huus’. Mien buurwichie kwam uut Börk en zee ‘hoes’. Mien pap preut plat en mam Nederlands. Wij hadden het in huus wel veul over taolen en de verschillen dertussen. Ik bin meertaolig opgruid.”
Bij Enting in hoes in de Asser wiek Kloosterveen komt het Drèents overal terug. Tot op de koffiemokken an toe. ‘Vernuver je der met’ stiet derop. Enting: ,,Nuver is zu’n woord waor mien mam as Friezin an wennen mus. In het Drèents is het iets positiefs - leuk of mooi - maor in het Fries betiekent het raar. Het hef een veul negatievere lading.”
Eigenheid
Enting woont nou alweer roem virtig jaor in Assen. Ze hef jaorenlang juf west en warkt nou veur Bibliotnet Drenthe in verschillende bibliotheken. Heur underwieservaring en heur interesse veur taol komt daor goed van pas. ,,Wat ik zo mooi vin is dat elke bieb, of het nou in Zuudlaoren, in Coevern of in Börk is, zien eigen karakter hef en toch bint ze met mekaar verbunden. Zo is dat ok met varianten in taolen. Iederien hef zien eigenheid en het is belangriek daj kunt wezen wie aj bint, maor tegeliek moej ok de taol spreken die iederien kan verstaon. Nederlands as het möt, Drèents as het kan.”
Het eerste dat de Assense ooit daon hef veur het Huus van de Taol is het inspreken van een Drèentstaolig navigatiesysteem veur in de auto. ,,Ik vun dat een mooi veurbeeld van dat streektaol niet oubollig is, zoas wel ies dacht wordt. Het is echt van nou en aj het kunt, is het een vörm van riekdom, waor aj trots op wezen mugt. Veur mij is het mien dagelijks leven. Het Drèents is een stukkie van mijzölf.”
Praothuus
,,Mien missie as streektaolambassadeur is het Drèents zichbaar te maken in het openbare leven. Dat gebeurt under andere met het Praothuus, daw vanof meert tot oktober hebt in warenhuus Vanderveen in Assen. Op de entresol, net boven de begane grond, bint daor alle woensdag- en zaoterdagmiddagen streektaolvrijwilligers en kunt mèensen binnenlopen. Der komt op zaoterdagen ok verschillende schrievers veurlezen en 13 augustus gef Egbert Meyers een optreden met dichter Egbert Hovenkamp II.”
Deur het Praothuus komt Enting en heur streektaolvrijwilligers in Assen geregeld an de praot met winkelend publiek dat overal vort komt. ,,Het dreit um herkenning en erkenning van de streektaol. Mèensen die van huus uut vrogger Drèents preuten en het misschien wegstopt hebt, daorbij ziew geregeld een glimlach van herkenning. Mèensen die bijveurbeeld uut het westen komt, vertel wij over de geschiedenis en de achtergrond van het Drèents. Dat leidt vaak tot meer erkenning.”
