TT Nightride-veurzitter Jan Puper uut Assen: 'Alle lagen van de bevolking doet metan'

Jan Puper kek uut het raom in de woonkamer in het centrum van Assen. „Het was me daor een klap!” Hij wes naor ’t end van de aans zo rustige straot. Daor stiet ’t Drèents Museum waor in jannewaori een kunstroof was. „Het is niet mooi wat er gebeurd is, maor Assen komp der wel bovenop. We hebben hier wel eerder roerige tieden had.”

Daormet doelt Puper under andere op de jaoren 60, toen der rellen uutbraken tiedens de TT. „Under het mom van: geef de burger brood en speulen, hebt ze in de jaoren dernao allerlei activiteiten organiseerd in de binnenstad”, vertelt Puper. Het gedonder weur wel minder, maor de motoren verdwenen ok uut het centrum van Assen.

„Dat was jammer”, zeg de 77-jaorige Assenaar. „As klein jonggie stund ik ieder jaor met mien pap en mam te kieken hoe de stad volleup met fietsers, auto’s, brommers en motoren. Iederiene was op weg naor de baan.” Puper gung met zien olders ok naor de races. „Wij stunden altied in de Barteldsbocht. Dat was ter hoogte van de boerderij van boer Bartelds, waor nou de krusing bij het NAM-kantoor en de Beilerstraat is.”

Puper is veurzitter van TT Nightride. Met zun tachtig man- en vrouwluu bouwt e sinds 2011 an een neie TT-traditie. „Wij hebt der met het organiseren van de TT Nightride veur zörgd dat de motoren weer terugkwamen in de binnenstad.”

„Elke motorrieder kan metandoen. We holdt de inschrieving op maximaal zeuvenhonderd dielnimmers.” Die dielnimmers verzamelt bij de Bonte Wever. Van daoruut vertrekt de stoet over een route deur het centrum. „Uuteindelijk bent der altied meer motorrieders op de route. Mèensen sluut zomaor argens an bij de stoet, maor aj dat doet, mis je wal wat”, lacht de Assenaar.

Want sinds een paor jaor worden de motorrieders zegend deur een predikant. „En dat vin ik nou zo mooi hè? Iederiene warkt samen veur de TT Nightride. Der is nooit gien gezeur of gedoe. Alle lagen van de bevolking doet metan.” Zo ok die keer toen de predikant niet kun. „Toen kwam der een bisschop uut Grunning veur de zegen”, glumt Puper. Wieder holden de leden van Motorbegeleidingsteam Assen de route veilig. Ze zetten krusings en wegen langs de route of en begeleiden de stoet.

Eerder deuden der ok oldtimers metan. „Dat giet nou niet meer”, zeg e. „De stoet stiet nog al ies stil en de motoren in dizze olde motorfietsen bent daor niet veur maokt. Dan verzoep ie ze en kriej ze niet weer an de praot.” Maor der bennen nog meer obstakels. „Motoren die op de openbaore weg riedt, moet een kentieken hebben. Dat hebt dizze oldtimers niet allemaol en die kuj der jammer genog ok niet veur anvraogen.”

De veurbereidings veur de TT Nightride 2025 bennen begund en veur het 100-jaorig bestaon van de TT zuukt Puper nog wat moois. „Daorveur loop ik even naor de overburen; het Drents Archief. Daor lig veul informatie over de historie van Assen en de TT. Ik gao ies even kieken of ik daor wat met kan.”