'As ze over Drenthe hen loopt te pissen, denk ik: ie mussen ies weten wat aj mist.' Foto: Jaspar Moulijn
„Ze hadden een brutaaltje neudig. Daorum wordde ik evraogd”, zeg Margriet Benak (59) over de reden van heur overstap van de kraant naor RTV Drenthe in 1994. „Maar eigenlijk bin ik een hiel zacht maagie.”
„Der bint wel ies meinsen die veur een interview zegt: ‘Wij zijn voor jou gewaarschuwd’. En uuteindelijk valt het ze altied mit.” Margriet Benak oet Assen zit op het terras bij RTV Drenthe en lacht. „Toen ik hier kwam warken, bint der collega’s naor de heufdredacteur egaone um te vraogen wat die ‘grote-bek-Benak’ hier doen kwam.”
Hier kom ik weg
DOS’46
Ze gruit op in een boerengezin met drei dochters bij Möppelt. „Wij hadden varkens en koeien. Mien oldste zus en ik mussen vaak helpen. Ik heb een hiel mooie jeugd ehad. Wij speulden veul in de schuur en buten. Ik was gien Barbiepop-maagie.”
Benak giet naor schoel op Nijeveen en korfbalt bij DOS’46. „Nao uutwestrieden schreef ik op de terugweg in de bus mit een verslag veur de Meppeler Courant.”
Hier kom ik weg
De streektaolrubriek Hier kom ik weg is een samenwarking met het Huus van de Taol en giet over Drenten en heur verhalen. As kandidaten plat praot, wordt ze in heur eigen variant van het Drèents citeerd. Schrievers Jessica Bonnema en Annemiek Meijer gebruukt heur eigen variant: resp. het Zuudoost-Veen- en het Zuudoost-Zaand-Drèents.
De kraant
Nao het gymnasium giet ze journalistiek studeren in Kampen. „Mien ofstudeerwarkstuk har as titel ‘Regionale journalistiek, een ondergeschoven kindje’. Ik wordde etriggerd deur een artikel in de Volkskrant over lokaal neis in Kampen; een hiel badinerend stuk.”
Ze löp stage bij de Kamper Courant en blef daor warken. Later schref ze veur het Hoogeveens Dagblad en vanof 1990 warkt ze veerenhalf jaor bij het Nieuwsblad van het Noorden in Assen. Daor woont ze nou al 35 jaor. „A’k bij mien va op de boerderije koom, bin ik echt thuus, maar Assen vuult inmiddels ok as thuus.”
Cassata
Bij RTV Drenthe warkt Benak de eerste jaoren veural veul veur de radio. „Ik crosste de hiele provincie deur um interviews op te nemen. Dat ‘körte-baan-wark’ is mooi, maar ik was bliede da’k ok het programma Cassata much gaon doen, mit meer diepgang. Het varieert van stevige gesprekken over politiek tot hiel leuke of gevulige gesprekken over aandere onderwarpen.”
Heur rooie haor hef der an bijdragen dat ze niet op heur mondtie vallen is, denkt ze. „As kiend bin ik hiel vaak uut-eschölden. Van mij ofbieten he’k toen wel eleerd. Ik har vrogger echt een hekel an mien haor.”
Margriet Benak prissenteert al 31 jaor het radioprogramma Cassata. Foto: Jaspar Moulijn
Op warkgebied hef ze veul mooie dingen daon. „Het programma De Trektocht vun ik fantastisch. Doodvermuiend, maar prachtig.” Ok hef ze nog altied veul plezier an het warken as verslaggever en het maken van Cassata.
Zwaore periode
Ien periode in heur leven hef Benak lange tied niet warkt. „Mien zeun hef as baby kanker ehad. Dreikwart jaor woonden wij haoste in het UMCG. Een hiel zwaore periode, ok umdat der kienderties um oes hen doodgungen. Ik kan daor nog niet normaal over praoten”, zeg ze en ze wref wat traonen weg. „Mien mam was niet zo lang daorveur onverwacht overleden op heur 62e. Ik heb heur in die periode vreselijk emist.”
Heur zeun is nou 20 jaor heur dochter 18. „Zij bint het mooiste wat mij is overkomen.”
Boerendochter
De streektaol is in heur wark altied van pas kommen, zeg ze. „In mien tied bij het Hoogeveens Dagblad mus ik bijveurbeeld boeren uut Hollandscheveld interviewen over de mestheffing. Ik zee: ‘Moi jongens, wat hej in de koffie? Praot mar gewoon plat heur. Ik bin een boerendochter en weet alles van stront’. Ik zag ze ontspannen.”
Nog altied wordt ze grammieterig as mèensen negatief praot over de regionale journalistiek of over ‘heur’ Drenthe. „Ik vule mij Dreints en as ze over Drenthe hen loopt te pissen, denk ik: ie mussen ies weten wat aj mist.”
