De rubriek Hier kom ik weg is een samenwarking met het Huus van de Taol en giet over Drenten en heur verhalen. Bas Hof is een geboren en getogen Runer. Hij verkocht gereedschap en in zien vrije tied zit e geern op de crossmotor. Dat de rechter in meert de offroad-rit van zien club MC’80 verbeud, was zoer, ,,maar der is wel hiel veul saamheurigheid ontstaon”.
Auto’s en motoren hebt altied zien interesse had, vertelt Bas Hof (41) an de keukentaofel in Rune. Hij is al meer as twintig jaor lid van de plaotselijke motorclub MC’80. Offroad rieden is zien ding. ,,Ik bin een echte tweitaktpiloot. Wat is der nou mooier as deur de bagger rossen?” zeg e met pretoogies. ,,Het geluud van zo’n motor vien’k mooi, maar der zit ok echt uutdaging in; het is conditie- en krachtwark.”
Hier kom ik weg
In het dagelijks leven ‘crosst’ de Runer Overiessel, de Noordoostpolder en een stukkie van Friesland deur um gereedschap van Snap-on Tools an de man te brengen, veural bij garage- en landbouwmechanisatiebedrieven. De streektaol komp daorbij nog wal ies van pas. ‘’Maar ik spreek collega’s uut het hele laand en ik passe mij wel an a’k bijveurbeeld belle mit iene uut Gouda of Limburg.”
,,Zij heurt trouwens wel altied da’k hier weg koom. Dat maj ok best heuren. Vaak wordt dialect bestempeld als iets veur mensen mit een laag IQ, veural deur lu die het zölf niet spreekt, maar dat is nargens op baseerd.”
Broodsmeerstandaard
Hard warken is hum niet vrumd. ,,Ik heb van huus uut eleerd daj je verantwoordelijkheid nemen mut. Zölf de boel regeln. Der kan oe van alles overkomen, maar ie bint zölf an zet. Ik hanteer daorveur de ‘broodsmeerstandaard’: zölf ’s mörgens de stoete smeren, daor begunt het mit.”
Het irriteert hum dat mèensen maor al te vaak niet heur verantwoordelijkheid nimt. ,,Ik marke het in mien wark: mensen beleuft oe terugge te bellen, maar doet het niet. Of kiek naor de politiek: as der fouten emaakt bint, wordt dat vaak lange ontkend.”
Crossen deur de bos
Hof kwam eerder dit jaor in het neis toen zien geliefde offroad-rit, die al haost virtig jaor bij Rune reden wordt, niet deurgaon mug van de rechter. De gemiente De Wolden har fouten maakt bij de vergunningverlening. Crossen deur de bos, kan dat nog in dizze tied? Hof vindt van wal: ,,Ien keer per jaor holle wij dizze rit en wieder gauw naor de crossbaan. Dit veurkomp wildcrossen.”
,,Kiek, ik snap dat wij niet dwars deur Natura2000-gebied, zoas het Dwingelderveld, mut rieden. Die natuur muj bescharmen.” Maor de stikstofanpak van de overheid helpt volgens hum niet. ,,Wij moet juust veule meer investeren in waterstof, zoda’w minder uutstoot. Wij mist inspirerende leiders die wieder in de toekomst kiekt. Crossmotoren op waterstof? Dan kriej ie mit een lichtere motor meer gaank, dus dat hef veurdelen, maar die techniek stiet nog in de kienderschoenen.”
MC’80 is al begund met de organisatie van de offroad-rit veur volgend jaor. Een duur ecologisch underzuuk is daorveur neudig. Ze trekt samen op met de motorclub oet De Wiek die tegen hetzölfde anlöp. ,,Der is veul saamheurigheid ontstaon en wij hebt veul bijval ehad toen het of-elast wordde. Wij hebt de gemiente nou ok mit. Die har dit jaor veur het eerst mit neie regels te maken en daormit hew pech had. Ze kiekt nou naor een oplössing veur ankommend jaor.
