Cor Timmerman in het tenue van zien cluppie HZVV. Eigen foto
De rubriek Hier kom ik weg is een samenwarking met het Huus van de Taol en giet over Drenten en heur verhalen. Cor Timmerman (53) oet Hoogeveen is timmerman en hobbyboer. Ok is e HZVV-man in hart en nieren en mag e zuch de ‘miest loze Drent van 2022’ numen.
Drèents was de voertaol vrogger op de boerderij tussen Hoogeveen en Alteveer, waor Cor Timmerman opgruide. En dat is nou niet aans. ,,Maor tegenwoordig praote wij ok wel een beetie Nederlands, heur. Wij doet een beetie van beide. Onze dochter hef een hekel an plat praoten, maor de beide zeuns doet het wel.”
Timmerman, die veurige week as winnaar van het spelprogramma LOOS bij RTV Drenthe oet de bus kwam, woont op dezölfde stee as vrogger, al is de boerderij der niet meer. ,,Eind jaoren ‘70 mussen de boeren over op de melktank, de bussen gungen de deure uut. Dat leek mien va wel wat, maor toen kwaamp e op 49-jaorige leeftied uut de tied en is die tank der nooit ekomen. Wij hebt daornao het bedrief of-ebouwd. Mien breur en ik holdt nou hobbymaotig schaopen.”
In de jaoren ’70 is de boerderij vervangen deur een nei hoes. ,,Toen zag ik hoe mooi het was um wat te bouwen, wus ik dat ik dat ok wol. Ik heb een timmermopleiding edaone en in 1985 bin ik begund bij een bouwbedrief in Hoogeveen.”
Erelid HZVV
Tegenwaoordig warkt e in een betonfabriek in Raalte waor mallen maakt wordt veur in de bouw. ,,Dat doe ik vier dagen, zoda’k ok tied hebbe veur de schaopen en veur voetbalclub HZVV. Daor zit ik in allerlei commissies en bin ik de kartrekker van het carbidschieten mit old en nei. Wij bint nou drok mit de veurbereidingen veur oes jaorlijkse jeugdtoernooi. Op 18 juni neemt zestig teams het tegen mekare op.”
Veurig jaor hef de Hoogeveense voetbalclub Timmerman benuumd tot erelid. Hij is nou 43 jaor lid. ,,Ik bin altied keeper ewest en dat bin ik nog, in HZVV 9. Dat is echt een vriendenteam. Onze jongens bint ok gaon voetballen. Ik heb ze as kiender al vrij vrog miteneumen naor de club en toen het kun, bint ze lid eworden. Ien van de mooiste dingen die aj as vader doen kunt, is met oen eigen kiender naor de voetbal gaon.”
LOOS
Zien zeun hef hum opgeven veur de Drèentse tv-quiz LOOS. ,,Ik hol wel van tv-spellegies en mien kiender zeden al da’k mitdoen mus, maor ik heb mij niet op-egeven. Ik was ok hielemaol verbaosd toen RTV Drenthe mij belde da’k mitdoen kun.”
De quiz dreit um kennis van Drenthe en van de streektaol. ,,Ik vien het Dreints wel een mooie taol. Ik mag het liever heuren as Fries. Dat vien ik een beetie een spraakgebrek, haha. Een echte veurvechter van de streektaal bin ik niet, maor het mag ok niet verleuren gaon. Dat zul zunde wezen. Eigenlijk zulden kiender op schoele ien uurtie in de weeke Dreints mutten kriegen.”
Dat e de quiz van RTV Drenthe wunnen hef, schref Timmerman veural toe an geluk. De opnames waren eind meert en hij hef zuch in hoes een maond lang stil holden, umdat e vun dat het een verrassing wezen mus. ,,Allent mien zeune die met ewest is, wus dervan. Ik heb een trofee en een iPad ewunnen. Die har ik evenpies in het nachtkassie verstopt.”
