Roelof Rutgers: 'In zwembad De Leemdobben is altied wat te beleven.' Foto: Marcel Jurian de Jong
De rubriek Hier kom ik weg is een samenwarking met het Huus van de Taol en giet over Drenten en heur verhalen. Roelof Rutgers uut Vreis is manager van drie zwembaden en raodslid veur Leefbaar Tynaorl.
„Ik begunde nao de mavo in Vreis an de sportopleiding CIOS in Heerenveen umda’k wieder wol in de voetballerij”, zeg de 57-jaorige Roelof Rutgers. Hij zit op het terras van zwembad De Leemdobben in Vreis. „Maor veur mien opleiding mus ik veul zwemmen. Daor har ik zoveul lol an da’k oeteindelijk niet in de voetballerij, maor in de zwemwereld terechtkwam.”
Zwemmen in de regen
Via vekaansiebaonties gung Rutgers as badmeester an ’t wark en nou is e alweer jaoren manager van de zwembaden Aqualaren in Zuudlaoren, De Leemdobben in Vreis en Lemferdinge in Potterwol.
Hier kom ik weg
Rutgers vindt het bij de butenbaden mooi dat die in een grune omgeving liggen. „En vanzölf de verscheiden weersomstandigheden waor aj met te maoken hebben”, zeg e. „Der kommen hier vaste bezukers die elke dag baonties trekken. Ien van heur is een vrouw van in de 90. Met regen of met zunne, zij komp altied zwemmen en stapt nao tied boeten onder een kolde douche!”
Met mooi weer kommen der meer recreatieve zwemmers. „Femilies oet de wiede omtrek.” Gezellig en mooi veur de inkomsten. „Maor warken in de hitte kan zwaor wezen. Dan heur je op het neis daj kalm an moeten doen. Dat kan ja niet aj in een zwembad warkt. Met zulk weer is ‘t zo drok, daj hier over de koppen lopen kunnen.” Um toch wat verkoeling te zuken giet Rutgers wel iens even met de voeten in het water. „Dan kan ik daornao weer wieder met mien wark.”
Duurzaomheid
As manager is Rutgers altied gangs met van alles. „Van de techniek in de machinekamers, tot de administraotsie en as der ain zaik is, stao’k zölf ok nog wel ains as badmeester an het bad.”
Het water van De Leemdobben is 24 graoden. Het zwembad is al een poos ansloten op zunnepanelen, zunnecollectoren en warmtepompen. Dat mak Rutgers trots. „Het gas hebben wij vortdaon en der kommen zwembadmanagers oet huil Nederland kieken hoe wij de duurzaamheid hier veur mekaor hebben.”
Gemienteraod
Rutgers is een femilieman en holdt van zien previncie. Hier vortgaon zol e dan ok niet gauw doen. „We hebben hier zo veul moois. Ik hol van de natuur en de verdraogzaomheid van Drenten onder mekaor.”
Bij Leefbaar Tynaarlo zet e zuch in veur de leefbaarheid in zien woonplaots. „Maor wij organiseren hier in De Leemdobben ok activiteiten veur alle leeftieden. Van meziek met een dj veur de jongern tot aquajogging veur de volwassenen. Der is hier altied wat te beleven.”
TT
Rutgers mag ok geern naor de TT gaon. „Ik gao altied naor de races, maor ok naor het TT Festival in de stad”, zeg e. „Ik kiek altied bij het podium met Nederlandstaolige meziek. Verleden jaor zung Jeffrey Kuipers oet Hoogeveen daor nog.” Maor Rutgers holdt ok van Drèentse meziek. „Lohues luuster ik nog wel ains. En op het TT Festival gao’k vanzölf naor Mooi Wark. Dat vind ik donders mooi.”
Bij de races stun e eerder altied op het talud. „Maor verleden jaor zat ik veur het eerst op de heufdtribune. „Mooi in de schaduw under dak.” Hij lacht. „Dan huuj ok niet zo wied te lopen om de keel te smeren.”
