Alja (66) is een vaste weerde bij ’t Anker in Hollandscheveld: ‘Ik mag hiel graag dingen regeln’

Op starven nao dood was het dörpshoes in Hollandscheveld in 2009. „De gemiente gaf het dörp de keuze: ’t Anker giet op slot of het wordt nei leven in-eblaozen. Uut een enquête van Plaatselijk Belang kwam een ‘Koreaanse’ uutslag: 99 procent van het dörp was veur deurgaon”, gniest ze.

Nao een flinke verbouwing giet ’t Anker in 2012 weer lös. Nou is der zowat alle dagen reuring: van vergaderingen en rippetities tot cursussen. Kiers zit in de evenementencommissie die alle jaoren tientallen activiteiten organiseert. „Wij maakt altied een jaorboekie, dat deur vrijwillgers rond-ebracht wordt. As zij um tien uur ’s mörgens begunt mit bezörgen moew bij de tillefoon zitten, want dan hew vief minuten later de eerste anmeldingen.”

Der bint veul creatieve workshops. „Dingen as bloemschikken en macramé bint tegenwoordig ok in trek bij jongern. Der zit altied twintigers bij.” Kinderactiviteiten bint der ok, zoas lest toen opa’s en oma’s samen met de kleinkinder een high tea maakt hebt. „Dat was een idee van een basisschoelleerling uut het dörp, hartstikke leuk.”

Ervaring met kinder hef Alja Kiers zat: ze hef 25 jaor an schoel staon in Heino, bij Raalte. „Mien moe was ok underwiezeres en ik heb in de eerste klas een hiel lieve juf ehad; ik dèenk dat ik daordeur het underwies in-egaone bin.”

Ze is geboren en getogen in een gezin met twie kinder in Vledder. In hoes weur plat praot. „In Heino he’k daor veule profijt van ehad. Daor waren olders die tegen oe opkeken en het lastig vunden um met de leerkracht in gesprek te gaon. ‘Aj liever plat praot, mag dat heur. Dat kan ik ok’, zee ik dan. Dan zag ik heur opluchting.”

Sinds 1999 woont ze in Hollandscheveld, waor heur man vort komp. „Hoewel de verschillen tussen zaand- en veen-Drenten tegenwoordig kleiner bint, heur ie hier eerder as in Vledder hoe mèensen over de dingen dèenkt. Ze bint directer, daor hol ik wel van.”

Nao 25 jaor basisunderwies begunt ze in 2006 as administratief metwarker bij oetgeverij Het Drentse Boek. „Nao ien jaor gungen wij samen met Drentse Taol op in het Huus van de Taol. Daor he’k tot 2018 met veul plezier ewarkt. Wa’k het mooiste vun? Open dagen organiseren. Ik mag hiel graag dingen regeln.”

Ze is opleid tot docent um Drenthe-cursussen te muggen geven en dat döt ze nog altied, in ’t Anker vanzölf. „We ziet veul fanatieke nei-Drenten op de cursussen. Van Drenten heur ik wel ies: ‘Niks veur mij, want ik kan al Drèents’. Maor de cursussen gaot over veul meer as de taol. Het is veur iederiene interessant en veur Drenten vaak herkenbaar. Veul groepen bint een mix van Drenten en nei-Drenten, dat warkt hiel goed. Der wordt in Hollandscheveld nog hiel veul plat epraot. Neie inwoners zegt vaak: ‘Blief maor Drèents praoten, wij verstaot oe wel.”

Kiers zet zuch geern in veur de streektaol, maor is ok somber over de toekomst. „Dèenk maor niet dat het Drèents blef bestaon. Taol veraandert nou ienmaol. Uuteindelijk verdwient het Nederlands ok, denk ik. Maor, zoas een old-collega altied zee: ‘Zolang e der nog is, moej goed zörgen veur het huus van de taol’.”