Hans Buls: 'Der bint altied nog weer mooiere foto’s te maken.' Foto: Boudewijn Benting
„Bliksem, störm, noorderlicht; het weer is mooiste um te fotograferen”, zeg Hans Buls (59) oet Slien. Zien foto’s haalt vaak de weerbulletins op de laandelijke tv. „Waorum het mooi blef? Het is altied aans. Der bint altied nog weer mooiere foto’s te maken.”
Waor e wegkwam, wol de anesthesist die hum twee week leden klaormeuk veur de ingreep an zien pols weten. Toen Hans Buls zee dat e oet Slien kwam, reageerde de arts dat e daor wel ies weerfoto’s van zag op tv. „Haha, ik zee: ‘Dan hej nou de heufdpries op taofel’”, lacht Buls.
Um de haverklap bint foto’s van Buls te zien, under meer bij de weerpraoties op RTL4, SBS en de NOS. „Lest luten ze der zölfs iene zien in Studio Sport. Dat vun ik zó grappig, want bij oes in huus keek iederien vrogger naor dat programma; iederien huul van sport, behalve ik. En dan komt mien foto uutgerekend daorin.”
Hier kom ik weg
Mooi Wark
Buls komp van Skonnerd. Daor gruit e de eerste tien jaor van zien leven op in een arbeidersgezin met zes kinder. As zien pap wark kreg bij gemientewarken in Slien, giet het gezin daor wonen. Hans Buls woont der nog altied. Hij warkt bij metaalbedrief Drameco in Coevern, maor in zien vrije tied is het fotografie wat de klok slat.
In zien jonge jaoren speult muziek een grote rol in zien leven. Hij speult as gitarist under andere zes jaor bij Mooi Wark. As e de pezen in zien elleboog ofscheurt en in 2002 stopt, volgt Arnold Kuik hum op. Buls döt al zien muziekspul de deur oet. „Mèensen vraogt wel ies of ik gien spiet heb da’k stopt bin, maor dat he’k niet. Ik vin het mooi veur die jongens hoe succesvol ze bint, maor zölf was ik wel klaor met dat wereldtie.”
Hier kom ik weg
De streektaolrubriek Hier kom ik weg is een samenwarking met het Huus van de Taol en giet over Drenten en heur verhalen. As kandidaten plat praot, wordt ze in heur eigen variant van het Drèents citeerd. Schrievers Jessica Bonnema en Annemiek Meijer gebruukt heur eigen variant: resp. het Zuudoost-Veen- en het Zuudoost-Zaand-Drèents.
Eigen stijl
Daornao is e – samen met een kameraod – lange tied verslingerd an re-enactment: ze speult met een club allerlei operaties oet de Tweede Wereldoorlog nao. Buls döt een opleiding tot parachutist en springt geregeld oet historische vliegtugen. „In die tied kwam ik in anraking met fotografie. Ik meuk foto’s van wat wij deden met een camera uut de oorlog.”
As e last kreg van zien rug, stopt e rigoureus met zien hobby, maor de fotografie blef trekken. „Online zöcht ik van alles uut en zo ontwikkelde ik een eigen stijl. Het extreme weer vin ik het mooiste, veural de bliksem. Grappig, vrogger wa’k doodsbenauwd veur onweer en nou zuuk ik het op.”
Hans Buls: 'Mèensen vraogt mij geregeld of ik wel ies slaop.' Foto: Boudewijn Benting
Veur de lol stuurt e een keer een foto naor RTL. „Die kwam dezölfde dag nog op tv. Man, ik was haost laandelijk neis in het dörp: Slien op RTL, dat was wat, haha.”
Kerktoren van Slien
Buls blef foto’s maken en insturen en nog altied kreg e veul reacties as op tv bint. „Geld krieg ik der niet veur; het bint ten seconds of fame; altied weer biezunder as het lukt.”
Bliksem boven de kerktoren van Slien. Foto: Hans Buls
Miesttieds mak e foto’s in Slien en umgeving. Vaak ok ’s nachts. „Mèensen vraogt mij geregeld of ik wel ies slaop. Soms gao ik nao het fotograferen deur naor mien wark en dan bin ik an het eind van de middag wel kapot, ja.”
„Ik hol altied het weer in de gaten, buienradar enzo, zodat ik weet waor ik hen möt. Mien mooiste foto? De bliksem boven de kerktoren van Slien. Het hef me twee jaor an veurbereiding kost um die foto te maken.”
