Roelof Klinkhamer oet Slien: 'Daw bij de jeugd zo populair waren, wus ik niet'

„Wij weet precies waw an mekaar hebt”, zeg Roelof Klinkhamer (63) an de stamtaofel in De Deel in Slien. Hij en Harm, die as jongen samen opgruiden, hebt nog altied schik. Nao 38 jaor treedt ze nog altied deur hiel Drenthe op.

Nummers as De Mooiste meid van Slien en Likstien wordt tot wied boeten heur dörp Slien metzungen in theater- en horecazalen. „Maor daw ok bij de jeugd zo populair waren, wus ik niet.” Lachend vertelt Klinkhamer over een optreden veur een zaal vol jongen tot een jaor of 35 in november in Slien.

„Ze kwamen oet de hiele umgeving. Ik heb der van tevoren drei nachten van wakker legen. Ik dacht: hoe hol wij die jongen rustig as ze der ok wat bij drinkt?” Maor het wordt een legendarische aovend, beschref e. „Nao de pauze zungen ze warkelijk alle bekende nummers met. Wij wussen niet waw metmaakten.”

Alle jaoren past ze heur programma an. Dat Klinkhamer wat onthand is deur een polsbreuk nao een ongelukkie met een peerd wordt ok op het podium bespreuken, vertelt e. Hij lat de lange pleister op zien underarm zien. Een week veur oes gesprek is e opereerd „Die arts zee: ‘Mèensen nog an toe, wat ja botten’. ‘Daor kan ik ok niks an doen’, zee ik. ‘Nee’, zee e ‘Maor wij hebt de bolten niet zo lang.” Klinkhamer lacht hard. Weer een mooi verhaal veur op het podium.

Umdat e tiedens het vertellen veul met zien – ok beheurlijk grote – haanden prat, is goed te zien dat e al vaker ‘ongelukkies’ had hef. Het bovenste stuk van zien rechter wiesvinger verleur e op zien 4de in een gehaktmeul in hoes op de boerderij.

Met veer vingers van zien linkerhaand hef e jaoren later in een machine zeten. „Alle vingers lagen derof. De plastisch chirurg hef ze weer repareerd.” Allent het bovenste stukkie van zien linkerwiesvinger ontbrek. Terugplaotsen was een groot risico. „Toen leut ik mien aandere wiesvinger zien en zee ik: ‘Maak hum maor net zo lang as dizze’. Dan wa’k weer synchroon ja!”

Dat ongeluk is de anleiding dat e stopt as akkerbouwer. De horeca, waor e nou in zit, is hum ik niet hielemaol vrumd. „Mien olders hadden vrogger, naost het boerenbedrief, ok een klein café. Gewoon bij oes in hoes.”

Geregeld zat der dartig man ’s aovends. „As der een vergadering was en ze zaten allemaol te roken, rookte het boven in mien kamer net zo hard, deur de ventilatiereusters die mien pap en mam derin maakt hadden.”

Naost zien optredens en restaurant hef Klinkhamer ok nog achttien peerde op stal staon. Die liefhebberij hef e overnummen van zien pap. Hij fokt dressuur- en springpeerde, met hulp van zien dochter. Hij nuumt het een ‘oet de haand lopen hobby’.

De Deel begunt in 2007 as klein theater. „Het was niet makkelijk um dat van de grond te kriegen”, vertelt de eigenaar. Een jaor of zes later verbouwt ze het hiele pand en wordt De Deel oetbreid met een restaurant en terras. „Toen kwam de schwung erin. Mien vrouw Erica en ik hebt nou 45 man personeel. Wij hebt van niks iets maakt.”