Peter Eising uut Hesseln: ‘Aj hier opgruit, weej niet beter as daj veur mekaar klaorstaot’

De 38-jaorige Peter Eising hef der net een warkdag in de bliksembeveiliging opzitten. „Ik wark in Oldenzaal. Das nog an de goeie kaant van Nederland”, lacht e. De geboren en getogen Hesseler is nao zien wark drok gaangs met de organisatie van de activiteiten rond de Zudenveldtentoonstelling, die van dunderdag tot en met ankommend zundag in Hesseln holden wordt.

Vrogger was Drenthe verdield in zes dingspelen die elk heur eigen bestuur en rechtspraok hadden. Het Zudenveld is daor ien van. Nou holden de veurmalige gemienten die in het Zudenveld lagen om beurten het Zudenveldfeest. „Dat komp neer op acht darpen”, leg Eising uut. „Je bint as darp dus ienmaol in de acht jaor an de beurt um de festiviteiten te organiseren.”

De Zudenveldtentoonstelling stiet dit jaor in het tieken van naoberschap, veur Eising een belangriek en actueel thema. „Kiek, aj hier opgruit, weej niet beter as daj veur mekaar klaorstaot. As ik zie dat de buurman hulp neudig hef, dan help ik hum en aansum is dat net zo. Daor kuj van op an”, legt e uut.

Het naoberschap komp goed van pas bij de organisatie van de festiviteiten rond het Zudenveld. „Tentoonstellingsverieniging Het Zuidenveld organiseert alle jaoren de tentoonstelling, de veekeurings en de concoursen”, zeg Eising uut. „Daornaost hef elk darp heur plaotselijke organisatie, die de optocht met versierde wagens, de versierde tunen en de achtkamp in het darp organiseert.” Eising kwam zölf net veur de coronatied in het plaotselijk bestuur.

Deur de coronatied is het tien jaor leden dat Hesseln an de beurt was. Daordeur is het veur dit bestuur de eerste maol dat zij de activiteiten organiseert. „We hebt een kleine anpassing daon”, zeg Eising. „De route van de versierde wagens is dit jaor körter en giet twiemaol langs de cafés in Hesseln. Mèensen die kieken komt, kunt daor even een happie en een drankie doen.”

Der is in Hesseln nog veul meer waor Eising drok met in de weer is. „Morgenaovend he’k een wedstried van touwtrekken”, zeg e intied e zuch uutrekt. „Ja, dat hew ok in Hesseln: touwtrekverieniging De Waoghalzen. En weej wat ok mooi is? Ik loop zölf met meziekverieniging Excelsior in de Zudenveldoptocht, met de trom.” Eising lacht. „Ik zie je al dèenken: die döt ja álles. Nou, het wordt nog mooier: mien zus löp veurop as tambour-maître en mien breur en neef loopt ok met. As kind zat ik al bij Excelsior hier in ’t darp.”

Eising is een familieman en wil nooit uut Hesseln vort. Aj hum vraogen naor het mooiste plekkie in Drenthe zeg e beslist: „Thuus.” En dat is niet zunder reden. „De opa en oma van mien oma hebt het huus waor ik nou woon vrogger kocht. Het is daornao altied in de femilie bleven.”

Veur Eising bestiet der echt niks mooiers as thuus. Hij somt op: „Mien vrouw hef heur wark an hoes. Oes zeuntie Bartjan is de zesde generatie van mien femilie die in dit hoes woont. De umgeving is prachtig. De mèensen bent aordig.” De Hesseler is groots en tevreden. „Ik hoop dat Bartjan hier net zo fijn opgruit as de generaties veur hum.”