Nanda Zwiggelaar van De Kippesthee op ‘t Haontie: ‘Drenthe hef ja alles‘

„Kiek, hier hej een lekker stukkie huusgemaakt gebak.” As ze alles serveerd hef, giet Nanda Zwiggelaar (42) ok op heur terras zitten. De thermometer tikt de dartig graoden an en de hoge iekenbomen geven rondum De Kippesthee genog schaduw um ontspannen genieten te kunnen. „Kiek, in dat huus is mien mamme opgruid”, wes ze naor het huus schuun tegenover heur bedrief.

De femiliegeschiedenis van Zwiggelaar lig letterlijk op een paor honderd vierkaante meter. Zölf is zij geboren in een huus in ’t midden van ’t Haontie. „Mien olders wonen daor nog. Ze vinden het ok altied hartstikke mooi um te helpen in het theehuus.”

Dat theehuus bestiet nou vier jaor. Nao een loopbaon as kok in zörginstellings begunde Zwiggelaar in de coronatied veur zuchzölf. „Dat leup geliek goed. Wij hebben een groot terras en mèensen kunnen hier makkelijk op ofstand van mekaar zitten.”

De vriend van Zwiggelaar hef de naom Kippesthee verzunnen. „We wolden iets wat bij ’t Haontie paste, iets wat bij oeze beide bedrieven heurde en het mus Drèents wezen.” Dat zit der nou allemaol in. „’Kippe’, van oeze vleeskukens, ‘thee’ van het terras en het theehuus en ‘stee’, een plek waor aj geern nog ies weer komt.”

Zwiggelaar mag gasten ok geern uutleg geven over beide bedrieven. „Ik vin het mooi as mèensen hier wiezer vort gaot as dat zie hier ankwamen.”

’t Haontie hef maor twee straoten, maor an anloop gien gebrek. Zwiggelaar is regelmaotig stempelpost veur evenementen as de Drentse Wandelvierdaagse vanuut Oring en de Drentse Fiets4Daagse. ,,Dan komt hier zo’n duzend man per dag.” In 2023 weur heur stempelpost veur de Fiets4Daagse uutroepen tot de gezelligste stempelpost van dat jaor. „Dat was mooi. Ik doe altied mien best um der wat moois van te maken veur de gasten.”

Zwiggelaar is al vanaf heur 15e actief in het dörpsleven. De sociale activiteiten en gezelligheid in ’t Haontie in de bienen holden, zit heur in het bloed. „Mien opa was vrogger ien van de medeoprichters van stichting Ons Dorpshuis, waor ik nou veurzitter van ben.” En dat niet allent. Opa was ok regisseur bij de plaotselijke tenielverieniging Tovertha. Net as Zwiggelaar heur mamme nou is. „En ik speul zölf ok alweer bijna dartig jaor teniel bij Tovertha”, lacht de sociale duzendpoot.

„Wat ik nog meer doe? Hej even?” Zwiggelaar somt op: „Ik ben betrökken bij dörpskraant Het Hanegekraai. Ik zit in de activiteitencommissie die under andere het Sinterklaosfeest veur de kinder organiseert en met een antal inwoners ben ik drok gangs met de Trapveldtrekkers. Da’s een cluppie mèensen die een belevingstuun opzetten wil, waor inwoners van alle leeftieden samenkomen kunnen en buuten actief wezen kunnen.”

Dat Zwiggelaar nooit meer vort giet uut ’t Haontie mag dudelijk wezen. „Ik hol van mien dörp, van oeze previncie. Drenthe hef ja alles!”