Undernimmer André Bouwmeester oet Holthe: ‘Van holt kuj alles maken’ | Hier kom ik weg

„Ik zul der haost een boek over schrieven kunnen”, zeg André Bouwmeester oet Holthe as e verteld hef hoe hij kommen is waor e nou is. „In Amerika bi’j een succesvolle undernimmer aj minstens drei bedrieven hebt ehad. Hier denkt mensen veural: wat döt die vent toch allemaol?”, vergelek e. „Ik heur soms klanten die as hier op zaoterdag holt koopt klagen over heur wark. ,,‘Nou, dan hol ie der toch met op!’ zeg ik dan. Maar dat doet ze niet, want het gef wel zekerheid enzo. Tja…”

Zölf is de undernimmer (49) niet bang um risico’s te nimmen. Ok niet op sportief gebied. Bouwmeester hef op hoog niveau an motorcross en later an wegracen daon. ,,Ik heb zeker ongelukken ehad, maar nog nooit wat ebreuken”, zeg e, intied e op de ruwholten taofel in de kantine naost zien hoes klopt.

De geboren en getogen Pesser hef financieel wal ‘breuken’ west nao een grote grondwarkklus, waorbij e - deur een conflict boeten hum um - fluiten kun naor zien geld. „Maar daor bin ik starker uutekomen.”

As 8-jaorig ventie zat e al op de trekker. Zien pap har een loon- en grondverzetbedrief. „Pap bracht mij met de trekker met bijveurbeeld de cultivator derachter naor het laand en dan was ‘t: Ie redt oe maar!”

’s Weekends was het gezin, dat oet drei kinder bestund, vaak op pad veur de motorcross. Ok Bouwmeesters breurtie dee met an wedstrieden. „Wij gungen het hiele laand deur.”

Drèents was de voertaol. „Maar in Zwolle, waor ik een weg- en waterbouwopleiding edaon hebbe, vunden ze mij maar een aparte verschiening mit mien taaltie. Der weur ok wel um elachen. Tot ik bij een jong uut Koekange in de klas kwam, die ok hiel plat preut en gewoon zuchzölf bleef. Dat gaor ik ok doen, besleut ik toen.”

Het warken met holt döt e veur het eerst op de lts in Hoogeveen. „Prachtig vun ik dat. Holt is een natuurproduct en ie kunt der alles van maken. Dat vin ik zo mooi.”

Maor Bouwmeesters leven bestiet intussen oet veule heufdstukken. Hij hef een grondverzetbedrief in Börk en had een succesvolle motorzaak in Beilen. Hij bleek een verdienstelijk schilder en weur oeteindelijk asbestdeskundige. Toen het wark in die sector terugleup, begund’e op advies van een kennis een jaor of vief leden met het zagen van holt veur de verkoop. „In de coronatied was het holt opiens niet an te slepen. Iederiene wol ja overkappings en schuttings bouwen.”

Zo maakte Holt uut Holthe een vliegende start. Bouwmeester bestiert de zaak nou samen met zien neef. Ze verkoopt an bedrieven en particulieren. „In het begun haalden wij veul holt uut het butenlaand, maar nou kriege wij aal meer an-eleverd uut de regio. Het liefst wil ik alles uut Drenthe halen, zo duurzaam meugelijk. Wij kriegt hier de stammen en daor zage wij planken en balken van. Dat wat overblef, verkope wij as braandholt.”

Hij hef bewust keuzen veur een Drèentse bedriefnaam. De taol is belangriek veur Bouwmeester. „Mit mien vriendin en 10-jaorige zeun praot ik ok plat. Het zul zunde wezen as de streektaal in de toekomst verleuren giet.” En de toekomst van Holt uut Holthe? „Wij hebt plannen um een winkel te begunnen in Beilen. Het lijk mij prachtig um weer in de winkel te staon.”