Zangeres Miriam ter Weeme van Skonnerd: 'Wij zit hier op gold' | Hier kom ik weg

Heur hoes op Skonnerd is makkelijk te vinden: de poster van theaterspektakel De Vlinderprinses hangt veur het raam. Miriam ter Weeme (51) speult de rol van juffrouw in het Drèentstaolige muziektheaterstuk van Harm Dijkstra en Jan Kruimink, dat begun september oetvoerd wordt in Zweel.

Ze zingt under andere een sololied en een duet met heur tegenspeulster, zangeres Martijje Lubbers. „En warm bad”, straalt ze. Ze zingt al vanof heur studententied in bands en leert van Martijje weer neie dingen op het gebied van zangtechniek. „Wij bespreekt ok de intentie van de liedern; wat wil wij uutdragen? Beleving is hiel belangriek.”

Nao Nors Staal, een productie van BUOG in Sappemeer eerder dit jaor en Het Ontzet van Coevorden end 2022 is dit heur darde musical.

Ter Weeme gruide op in Tynaorl met een pap oet de Achterhoek en een Haagse mam. Heur pap preut Drèents en ok in het dörp kreeg Ter Weeme de streektaol met. Op heur 19e verhoesde ze met heur toenmaolige vriend hen het westen. Ze gung naor de heao in Rotterdam en belandde oeteindelijk in Den Haag, waor ze warkte, trouwde en drei kinder kreeg. Deur de jaoren hen zung ze bij allerlei discoformaties.

„Het zingen he’k van mien mam. Die zat vrogger in een folkband in Den Haag, maor zij was hiel verlegen. Wat dat angiet liek ik meer op mien pap, die is extraverter en hef meer lef.”

Twie maol kreeg Ter Weeme de heufdrol in musicals op de legere schoel in Tynaorl en met vriendinnegies wun ze playbackwedstrieden as de Dolly Dots. „Toen kreeg ik de smaak van het optreden echt te pakken.”

Zij en heur man wolden in 2020 hiel geern vort oet Den Haag. „Dat har under andere te maken met criminaliteit en onveiligheid daor. Het stun oes aal meer tegen. Ik wol naor huus, terug naor Drenthe.” Ze vunden een mooi hoes op Skonnerd. „Hier heb wij alles: winkels, veul verienigingen en rechtstreekse busverbindingen hen Emmen en Assen, handig veur oeze zeuns die daor naor schoel gaot.”

Ze warkt as zölfstandig adviseur veur undernemingsraoden in het bedriefsleven en is ok in te huren as extern vertrouwenspersoon. „Dat is, naost muziek, mien aandere passie”, vertelt ze. Op muziekgebied zit Ter Weeme ok niet stil. „Nao oeze verhuzing he’k hier de Disco Dance Department opricht; een discoband met leden uut Drenthe en Overiessel. Op keuningsdag hew nog optreden in Emmen.”

Ze prat met een Haags accent, maor kan muiteloos umschakeln naor het Drèents. „Eitje”, zeg ze over de teksten die ze leren möt veur De Vlinderprinses. „Wat ik zo gaaf vin an zulke theaterproducties is dat het grootschalig locatietheater is en dat dielnimmers overal weg komt. Ze hebt allemaol verschillende achtergronden. Ik hol hiel erg van grootse dingen.”

Wonen op Skonnerd bevalt het gezin oetstekend. „Sommige mèensen bint wat roeger hier, maar ze hebt een klein hartie. Iederien mak een praotie, ie kunt overal binnenlopen en der wordt hartstikke veul organiseerd. In De Vlinderprinses zit een liedtie met de titel Goldkoorts; nou wij zit hier op gold, echt. Der wordt wel ies klaagd, maar dan beseft mèensen niet hoe goed wij het in Drenthe hebt en hoe mooi het hier is.”