Gerard Koops in de brouwerij in Bronneger. Foto: Boudewijn Benting
„Bierbrouwen is een ambacht”, zeg Gerard Koops uut Gaiterveen. In het daogelijks leven is e licht- en geluudsspecialist, maor Bronneger Bier is zien hobby. „Dat kuj gelukkig niet zomaor vervangen deur kunstmatige intelligentie. Wij zult het zölf moeten blieven doen.”
De 40-jaorige Gerard Koops löp op zien wark in Assen deur een kantoor langs posters van het Bluesfestival in Grol. An een kapstok hangen TT-kaorten an keycords. „Dat is allemaol van evenementen waor wij het licht en geluud veur daon hebt”, wes Koops. In de keuken zet e de waterkoker an, mak een kop thee en löp deur het pand naor achter. „Kom, we gaot buten zitten.”
Under het afdak in de tuun koj in een - op zien Drèents - mancave terecht. Een sigaar lig op taofel. De auto’s op de A28 raozen in de verte veurbij. „Samen met mien collega’s doe ik het beeld, licht en geluud op evenementen. Je moet dan denken an congressen, schoelfeesten en festivals”, somt Koops op. „Maor strakkies moe’k ok nog even naor De Boskamp.”
Hier kom ik weg
In het Asser uutvaortcentrum zörgt Koops der ok veur dat alles qua licht, beeld en geluud het goed döt. „Dat möt gewoon goed wezen, een uutvaort kuj maor ien keer doen.”
Bierbrouwen
Zien wark vindt e mooi, maor veur zien grote hobby bierbrouwen schöf Koops geern alles an de kaant. „In 2020 begunde ik met kameraoden veur de aordigheid bier te brouwen. Wij had der zoveul schik an en het luup zo mooi, dat wij uutbreiden kunden”, vertelt e. „Ien van ons woont in Bronneger. Zo biw met de brouwerij daor terechtkommen en nuumden wij ons bier Bronneger Bier.”
Gerard Koops: 'Het is mooi daw alles zölf doen kunt. Foto: Boudewijn Benting
Veur bierbrouwen moej experimenteren duren en geduld hebben. Volgens Koops is het een ambacht. „Dat kuj gelukkig niet zomaor vervangen deur kunstmatige intelligentie. Wij zult het mooi zölf moeten blieven doen.”
Broezende Breur
Alle zaoterdagen brouwen de mannen heur bier in de brouwerij in Bronneger. En op dunderdag worden der bieren op de fles zet. Het brouwproces duurt vier week veur gewone bieren en zeuven week veur speciale bieren. Dat het een bult tied kost, mak Koops niks uut. „Soms moej gewoon mooie dingen maoken en niet allent veur snelheid en commercie gaon.”
Hier kom ik weg
De streektaolrubriek Hier kom ik weg is een samenwarking met het Huus van de Taol en giet over Drenten en heur verhalen. As kandidaten plat praot, wordt ze in heur eigen variant van het Drèents citeerd. Schrievers Jessica Bonnema en Annemiek Meijer gebruukt heur eigen variant: resp. het Zuudoost-Veen- en het Zuudoost-Zaand-Drèents.
Op de webstee van de brouwerij stiet bier met naomen as: De Toffe Tante, Olijke Onkel, Vrömde Vlegel, Broezende Breur en de Nustige Neef. „De bieren bent allemaol vernuumd naor femilie en bekenden van ons. We hebt ok het Huus van de Taol vraogd um met te denken over mooie namen waor alliteratie inzit”, zeg de brouwer.
„Het is mooi um onze taol in staand te holden. En we probeert ok um lokale ingrediënten in het bier te verwarken.” Zo is de Broezende Breur maokt van bessen van de Blauwe Bessenboerderij in Gasselternijveenschemond.
De bieren hebt namen as Vrömde Vlegel, Broezende Breur en Nustige Neef. Foto: Boudewijn Benting
Mooiste stukkie Drenthe
Samen met zien kameraoden an ’t wark wezen in de regio vindt Koops mooi. „Van mij huuft het bier de wereld niet over. Het is juust mooi daw alles zölf doen kunt: van het brouwen tot an het bezörgen van de bestellingen bij undernimmers in de regio.”
„Ik kom hier weg en hol dervan um hier rond te rieden. Ons dörp ligt op de grens met Grunning. Wij bint nog net Drenten. En misschien vindt een aander dit nait het mooiste stukkie Drenthe, veur mij is het dat wel. Ik wil hier nooit meer vort.”
