André Oeben: 'Mien kinder bint de viefde generaotsie die op dizze stee woont.' Foto: Marcel Jurian de Jong
„In het Drèents kuj dudelijk wezen, zunder iene of te braanden”, zeg André Oebens uut Grol. Hij is mede-eigenaor van een uutzendbureau in under meer de agrarische sector. „Wij warkt in het Noorden; hier prat iederien zien eigen dialect.”
Buten gromt het. In huus liggen de twee honden van de 47-jaorige André Oeben te snurken in heur maand. Aj deur de kleine raompies in de woonkaomer naor buten kieken, ziej de wit besneide straoten van Grol. Het liekt wel asof iene van boven poedersuker over de bomen en rieten daken uutstrooid hef.
Biezundere stee
„Mien kinder bint de viefde generaotsie die op dizze stee woont”, zeg Oeben groots. Lang leden trouwde zien overgrootva as boerenknecht met de boerendochter die op de boerderij woonde die hier vrogger stun. „Mien opa en oma hebt hier woond en mien pap en mam ok.”
De olde boerderij is jaoren leden ofbraand. „Het huus is vanneis opbouwd en sinds een paar jaor woont mien vrouw en ik hier met de kinder. Hartstikke mooi daw op dizze biezundere stee wonen kunt.”
‘Benauder veur joe’
Oeben is een tied chauffeur west van Mooi Wark en mag ok geern naor liedteksten van aandere Drèentse muzikanten luustern. „Lohues nemp je met in zien verhaol. Neem het lied Ze bennen benauwder veur joe as ie veur heur, dat zeg ik ok tegen de kinder as zij een prissentaotsie geven moet. Trouwens, laot leerkrachten maor ‘n uurtie in de week andacht geven an oeze Drèentse historie, dan weet kinder waor ze weg komt”, lacht Oeben.
Hier kom ik weg
De streektaolrubriek Hier kom ik weg is een samenwarking met het Huus van de Taol en giet over Drenten en heur verhalen. As kandidaten plat praot, wordt ze in heur eigen variant van het Drèents citeerd. Schrievers Jessica Bonnema en Annemiek Meijer gebruukt heur eigen variant: resp. het Zuudoost-Veen- en het Zuudoost-Zaand-Drèents.
Zölf gung e vrogger in Assen naor de landbouwschoel en warkt’e daornao onder aandere as kraanmachinist.
Uutzendbureau
Deur reorganisaotsies kwam e in de verkoop van keukens terecht. „Het adviseren vun ik mooi. Da’k een keuken an de man brengen mus, gung mij tegenstaon.”
Hij kun bij een uutzendbureau in Emmen an’t wark. „In die tied har ik wal ies met Jan Emmens te maken, die zien eigen uutzendbureau in Assen har. Uuteindelijk bin ik bij hum an ’t wark gaon. Vanof 2021 bin ik ien van de eigenaoren van Uitzendbureau Emmens.”
'Laot leerkrachten maor ‘n uurtie in de week andacht geven an oeze Drèentse historie." Foto: Marcel Jurian de Jong
Opdrachtgevers en warknimmers veur lange tied an mekaar verbinden, dat is Oeben zien doel. „Het is simpel: veur je begunt, moet bij iederien de spelregels bekend wezen. Wees dudelijk zunder iene of te braanden.”
Dat e meesttieds Drèents praot, komp in zien wark goed van pas. „De taol is helder. En wij warkt binnen de landbouw, het loonwark en in de grune sector. Daor praot de miesten in heur eigen dialect.”
In ’t veld en op de iesbaan
Oeben holdt van Grol en de natuur der umtoe. „Mien opa was jager en nam mij met ‘t veld in. Hij leerde mij: ‘As jager bi’j de oren en ogen van het veld. Vergeet nooit: Je mugt schieten. Je moet niet. Komp der een dag dat het nimmen van een leven niks met je döt? Dan moej geliek stoppen’.”
As bestuurslid van iesbaan Het Evenveen in Grol har Oeben dizze winter last van scheuvelkoorts. „Wij huurt het laand drei maond in ’t jaor en zörgt dat het underlöp. As het onder nul komp, wor wij fanatiek”, lacht e. „Is de baon klaor, dan zet we het op de socials en haol we de media derbij.”
Oeben holdt van het naoberschap in zien dörp. „Op de iesbaon is het hartstikke gezellig. Het verbindt mèensen. Dat vin ik mooi.”
