Roel-Poppe Lubbers bij het 'outdoor cabine camp'. Foto: Marcel Jurian de Jong
Aj een groepsaccommodatie hebt achter je hoes, hej altied reuring um je hen. Roel-Poppe Lubbers oet Grol wet niet aans. Hij gruide op bij kampeerboerderij Boerhaarshoeve van zijn olders en hef nou al virtien jaor zölf de touwgies in haanden.
„Ik bin hier geboren. Op dizze plek”, zeg Roel-Poppe Lubbers (49) in het kantoor tussen zien hoes en de groepsaccommodatie an de Schoonloërstraat bij Grol. Hij nam in 2011 met zien toenmaolige vrouw de Boerhaarshoeve over van zien olders, die de vroggere boerderij van Lubbers’ opa en oma in de jaoren 70 hadden umbouwd tot kampeerboerderij.
„Ik weet niet aans as dat wij alle winters an het verbouwen waren, dan weer een nei toiletgebouw, dan een slaopkaomertie derbij of wat neis op de minicamping die ze der ok bij hadden”, lacht e. „’s Zommers was het altied drok met gasten, dan mussen wij het verdienen.”
Hier kom ik weg
As kind helpt e geregeld met. „Ik vun het mooi. Het was gien verplichting, maor het was ok niet zo dat ik met de bienen op taofel zitten kun as het hier drok was.”
Kok of dierenarts?
In de zommer van 1996 gaot het levenswark van de familie en heur hoes letterlijk in rook op. „Die braand was heftig. Mien pap, mam, zussie en ik waren alle veer in huus. Hiel veul spullen bint verbraand.”
Maor de Boerhaarshoeve wordt herbouwd en kan binnen een jaor weer lös. Dat Lubbers het later overnimmen zal, wet e dan nog niet. „As kind wol ik kok worden of dierenarts. Ik heb ok lang twiefeld of ik niet de peerdensport in wol. Ik heb het peerdenvirus metkregen van mien pap.”
Hier kom ik weg
De streektaolrubriek Hier kom ik weg is een samenwarking met het Huus van de Taol en giet over Drenten en heur verhalen. As kandidaten plat praot, wordt ze in heur eigen variant van het Drèents citeerd. Schrievers Jessica Bonnema en Annemiek Meijer gebruukt heur eigen variant: resp. het Zuudoost-Veen- en het Zuudoost-Zaand-Drèents.
Nao een studie bedriefseconomie komp e eerst veur de klas as mbo-docent peerdenholderij. In zien vrije tied gef e under meer rieles en handelt e in peerde. „Ik heb op een bepaold moment besleuten dat dat maor hobby blieven mus. Aj een bedrief hebt zoas dit dan staoj ok zeuven dagen in de week an. Der is altied wat. Dan is het mooi um der even uut te kunnen stappen en wat aans te doen.”
Net even aans
De kampeerboerderij is de leste tien jaor oetgruid tot een groepsaccommodatie waor in totaal 240 gasten overnachten kunt, verdield over veer verschillende verblieven op het erf. „Ien daorvan is een outdoor cabine camp. Dat bint zes slaophuusies met puntdak, geschikt veur een groep van maximaol zestig mèensen. Da’s ok een groepsverblief, maor net even aans.”
Roel-Poppe Lubbers: 'Gien dag is het hetzölfde.' Foto: Marcel Jurian de Jong
Tegenwoordig is de Boerhaarshoeve het hiele jaor lös. Lubbers regelt ok activiteiten veur groepen. „De kinder, Mads en Valerie van 15 en 17 jaor helpt ok geregeld met. Wat der zo mooi is an een zu’n recreatiebedrief? Gien dag is hetzölfde.”
Tiedens het Holland International Blues Festival hef Lubbers een festivalcamping. Daor kampeerden dit jaor achthonderd gasten.
In de genen
Naost het bedrief en de peerde hef e ok nog tied um VVD-raodslid in Aa en Hunze te wezen. „Het klinkt misschien gek, maor ik wor daor een beter mèens van. As je hiel lang op je eigen bedrief en erf zit, zoas ik, dan kuj ok tunnelvisie ontwikkeln. Politiek is veur mij een hobby en het zit een beetie in de genen. Opa was raodslid en mien mam hef in de steunfractie van de VVD zeten.”
Of de muziek ok in de genen zit? Roel-Poppe Lubbers is de breur van zangeres Martijje. „Och, ik kan wel zingen ja. As mam jaorig is of der möt argens aans veur zungen worden, wor ik deur mien zuster vaak optrommeld um de tweede stem te zingen.”
