Roel Mennega gruide op tussen de trekkers. Foto: Marcel Jurian de Jong
„Gezondheid is niet te koop en da’s maor gooud ok”, zeg de 75-jaorige Roel Mennega uut Annen. Met zien oldtimer trekkers döt e met an ploegwestrieden. „Veurig jaor he’k metdaon an een ploougwedstried in Ierland. Hartstikke mooi!”
Roel Mennega weur geboren op 29 oktober 1949 in Eext. „Ik heb mien heuile leven in Eext woond. Mien olde heer en zien breuir bent zowat ningtig jaor leden een loonbedrief in Eext begund, daor ben ik opgreuid”, zeg e.
Mennega hef altied op het bedrief warkt. „Vanof mien 15e ben ik an ’t wark gaon. Ik ben as loopjongen begund, heb alles binnen het bedrief wel daon. Ik eindig nou nao mien pensioen ok weer as loopjongen”, lacht e.
Olde trekkers
Nao bijna 75 jaor kwam der in 2024 een end an het wonen in zien geboortehuus. Mennega en zien vrouw verhuusden van het loonbedrief in Eext naor een seniorenwoning in Annen. Heur zeun woont nou op het bedrief.
Hier kom ik weg
Mennega gruide op tussen de trekkers. Gien wonder dat e op een gegeven moment tientallen oldtimertrekkers har. Bij het older worden hef e de miesten nou verkocht. „Ien is weerum gaon naor Duutsland en stiet nou bij een verzaomelaor körtbij de fabriek waor een vroouger maokt is.”
Hij hef nog drie olde trekkers bij zien zeun in Eext staon, waorunder een Field Marshall uut 1949 en een Ford Dexta uut 1958. „Van sommige trekkers bent de underdielen nog nei te kriegen”, zeg Mennega. Veur de trekkers waorvan underdielen niet veur het oprapen liggen, is der gien man overboord. „Ze bent neeit veur niks zo old, die kriej niet zomaor kapot.”
Hier kom ik weg
De streektaolrubriek Hier kom ik weg is een samenwarking met het Huus van de Taol en giet over Drenten en heur verhalen. As kandidaten plat praot, wordt ze in heur eigen variant van het Drèents citeerd. Schrievers Jessica Bonnema en Annemiek Meijer gebruukt heur eigen variant: resp. het Zuudoost-Veen- en het Zuudoost-Zaand-Drèents.
De 75-jaorige is nog aal niet vies van warken. „Ik doou alles nog: mèeien, rooien en ploougen. Het blef gewoon mooi um te dooun.”
Ploegwedstrieden
En veural dat leste, het ploegen, hef Mennega gien windeier legd. Hij is lid van OTMV, de Oude Trekker en Motoren Vereniging en döt al jaoren met an ploegwedstrieden in binnen- en butenlaand. „Ik dèenk da’k wal 120 tot 130 priezen op de bovenverdeeiping staon heb”, wes e naor het plafond van de woonkamer. Hij wun vief maol een Nederlands kampioenschap ploegen en weur twee maol kampioen op de clubwedstrieden van de OTMV.
Mennega döt al jaoren met an ploegwedstrieden in binnen- en butenlaand. Foto: Marcel Jurian de Jong
„Ik ploougde ok met mien olde trekker in Ierland”, vertelt e groots. Veurig jaor gungen hij en zien vrouw daor naor een wedstried. Zien vrouw lat een foto zien van een Volkswagen-bus met een dreiasser anhanger derachter. Daorop staon de Ford Dexta en de Dreesman-ploeg. Al met al een hiele combinatie, veural op een veerboot. „We hadden underweg veul bekieks!” zeg ze.
Geessie en Geert
Het echtpaar is gezond en haalt alles uut het leven wat der in zit. „Gezondheid is niet te koop en da’s maor gooud ok”, vinden beiden.
Veur Dorpsmuseum De Kluis in Eext hef Mennega metdaon an het project ‘Op stap met Geessie en Geert’. „Kinder waren gaangs met klompies maoken, hoepeln en kleren wassen en bösseln. Der was gien-iene bij die nog Geert of Geessie heette”, zeg e. „Ze hebt nou allemaol van die gekke naomen.”
Zien vrouw vult hum an: „In de Meertmaond Streektaolmaond gao ik veurlezen op een legere schoel. We moeten der samen veur zörgen dat het Drèents blef bestaon.”
