Jan Schutrups: 'A'k enthousiast bin, praot ik zo plat as wat'. Foto: archief Duncan Wijting
De rubriek Hier kom ik weg is een samenwarking met het Huus van de Taol en giet over Drenten en heur verhalen. As der iene is die wet hoe belangriek is het um te weten waor aj wegkomt, dan is het Jan Schutrups oet Exloo wel. Zien ofkomst speult een grote rol in zien schoenenzaak.
„Oes logo hew liend van de Drèentse vlag. Allent heb wij der twee rooie sterren in. Ze staot veur mien beide dochters.” Jan Schutrups (59) kek trots. Lisa en Roos bint de viefde generatie in het familiebedrief.
Bij Schutrups Schoenen warkt zestig man en allent schoenen verkoopt ze allang niet meer. One stop shopping nuumt Schutrups het concept; in ien winkel terechtkunnen veur schoenen, (outdoor-)kleding en aj voetproblemen hebt.
„Wij wilt mèensen ok verrassen”, lacht e. „Ze verwacht over het algemien veul en wordt weinig verrast. Hier in de winkel is veul holt. Dat wordt associeerd met de natuur, een vekaansiegevuul. Daornaost hej ok een beetie het gevuul daj een kroeg binnenkomt, deur oeze bar. Drèentse keien hew ok. Wij bint trots op Drenthe en laot zien waor aw wegkomt.”
Hier kom ik weg
Zien laoten wat aj doet
Zölf gruide Schutrups op tussen de schoenen. Zien pap en mam waren altied drok met de zaak. Nao de Statenschool in Emmen, gung e hen de Academie voor Podologie in Rotterdam, waor e hiel veul leerd hef over voetproblemen en -zörg.
„Ik heb altied warkt vanuut de zörggedachte. Daornaost he’k op de Statenschool het vak marketing had. Die boeken verslund ik. Communiceren is zó belangriek. Ie kunt zo goed wezen in je vak, maor aj niet zien laot wat aj doet, kuj ok gien draagvlak creëren.”
Al jaoren hef e een eigen magazine en organiseert e evenementen in de winkel en ok boeten, zoas wandeldagen. Actief wezen op alle social media is ok belangriek, zeg e. Hij hef een marketingteam an het wark.
Lezings geven döt e ok al jaoren. In principe prat e dan Nederlands. Hij begunt te lachen: „Maor as ik enthousiast bin, gao’k over op het Drèents. Dan praot ik zo plat as wat. Lest in Zuudwolde opiens twee vingers vanuut de zaal: ‘Meneer, kunt u ook Nederlands praten?’”
Zien ofkomst hef hum vörmd. Zo hard as zien olders vrogger warkten, zo dee e het zölf ok. „Mien olders hebt moeten knokken um de zaak te laoten overleven en dat zit ok in mij.”
‘Iederien is zuchzölf hier’
Dat het belangriek is um altied jezölf te blieven, hef e later pas leerd. „Eerder leup ik met een stropdas veur, nou niet meer. Bedriefskleding hew ok niet. Iederien is zuchzölf hier en Drèents praoten met klanten gebeurt ok. Het stelt mèensen op heur gemak. Metbewegen met wie aj tegenover je hebt, is belangriek.”
As undernimmer hef e risico’s nummen en bint der ok dingen mislukt. „Dan lig ik een nacht wakker, maor de volgende dag gao’k weer deur. Mien veurruut is groter as mien achteruutkiekspiegel. En de starke dingen blieft wél overeind. Tegeliekertied moej je op mien leeftied ok ofvraogen hoever aj nog veuruut kieken kunt. Ik moet wel realistisch wezen.”
Toch denkt e nog niet an stoppen. Volgend jaor bestiet de zaak honderd jaor en brengt Schutrups een eigen wandelschoen op de markt. En der hef zuch alweer een jongere generatie andiend. Stralend: „In augustus bin ik opa worden. Mien opadag gao in straks wel verzulvern. Ik wil niet wachten tot mien kleinzeun groot is um van hum te kunnen genieten.”
