Undernimmer Anton Bardie oet Scheloo: 'Dat wat ik doe, möt me energie geven' | Hier kom ik weg

Helpen dörpen leefbaar te holden in dizze tied, waorin mèensen het vaak drokker hebt met zuchzölf as met mekaar, dat is waor Anton Bardie (43) drok met is. ‘Weerdevolle streken’ nuumt e dat.

Ok buurtundernimmerschap en gemienschapszin bint belangrieke termen in zien wark. „Hoe zörg ie derveur daj goed naor mekaor umkiekt en daj samen dingen doet en organiseert in een dörp? Naoberschap heurt daor ok bij. Ik wark as anjager, procesbegeleider of coördinator, hoe aj het ok numen wilt”, lacht e.

Dörpen maor ok gemienten en de Brede Overleggroep Kleine Dorpen (BOKD) kunt hum inhuren. Bardie warkt met belangenverienigingen an under meer dörpsvisies um dörpen in de toekomst limtig te holden. In Örvelt is e vanof veurig naojaor dörpscoördinator. Hij möt daor zörgen veur meer harmonie tussen alle belangenorganisaties in het monumentendörp.

Zu’n dörpsman kan niet aans as zölf ok in een dörp wonen. Zien hiele leven woont Bardie al op Scheloo. Lachend: „Nou, ik bin een half jaor wegwest. Veur mien ofstudeerscriptie in Eindhoven he’k toen in Helmond woond.”

Zien opa was veehandelaar en zien pap ventte met diepvriesproducten. „Ik har wel wat met handel. Daorum bin ik economie studeren gaon. Mien olders hadden een camping en dat interesseerde mij ok, dus heb ik de richting recreatie en toerisme keuzen.”

Nao wat umzwarvingen wordt e vertegenwoordiger bij een bedrief in kopieerapparaten, waor e veul leert en deurgruit. Nao verloop van tied raakt zien accu leeg, zoas e het zölf nuumt. „Ik dee al vrijwilligerswark veur de BOKD en in 2016 bin ik veur mijzölf begund as procesbegeleider in dörpen”, vertelt e.

„Laoter bin ik mij specifieker richten gaon op ‘weerdevolle streken’, buurtundernimmerschap en gemienschapszin. Ik maok ok video’s en podcasts over dörpen, waorin ik met mèensen in gesprek gao um te laoten zien wat der allemaol in die dorpen gebeurt en wat veur weerde dat hef veur de inwoners. Dat wat ik doe, möt me energie geven.”

„Ik zal niet gauw in een stad an de gang gaon”, vertelt e wieder. „Het verschil tussen een dörp en een wiek in de stad is groot. Dörpen hebt vanuut de historie veul meer een ziel; die bint ontstaon deurdat boeren der ooit wonen gungen. Een stadswiek is creëerd, die is op een tiekening bedacht.”

Elk dörp döt der tegenwoordig goed an um een dörpsvisie te maken, met daorin vastlegd waor de inwoners over vief of tien jaor staon wilt en concrete plannen um oet te voeren. „Vrogger was dat niet zo neudig, want veul umgaon met mekaor was hiel gewoon in een dörp. Der was vaok een grotere middenstand; inwoners waren ofhankelijk van mekaor. Tegenwoordig bint veul veurzieningen weg uut dörpen.” Der möt wat meer gebeuren um het dörp limtig te holden, wil e maor zeggen.

Hij prat geregeld plat, maor ok wel Nederlaands. „A’k argens kom, begun ik vaok in het Nederlands. Wordt der Drèents praot, dan gao ik zo metdoen. De streektaol komt wal van pas in mien wark, zowal in Grunning as in Drenthe. Zo gauw mèensen markt da’k ok van het plattelaand kom, prat het makkelijker.”