Jan Schipper bij Dierenweide Stroomdal in Beilen Foto: Hugo Faber
De rubriekHier kom ik weg is een samenwarking met het Huus van de Taol en giet over Drenten en heur verhalen. Jan Schipper oet Beilen is wetholder in de gemiente Midden-Drenthe. Tot twee jaor leden woond’e op de boerderij waor e zölf ok boer west hef.
De belangstelling veur politiek hef Jan Schipper van hoes oet metkregen. „Mien va was arg interesseerd in politiek, dus wij hadden het der in huus wel over en wij keken naor debatten. Mien overgrootopa hef ok ooit probeerd in de gemienteraod te kommen. Dat is niet lukt. Hij was lid van de blauwe knoop en wol de draank verbieden in Beilen.”
Schipper (54) lacht. Zölf wordt e rond zien 30e CDA-lid en hum lukt het in 2006 wal um in de raod te kommen. Met veurkeurstemmen. As e nao drei perioden ankondigt dat e stoppen giet, kreg e in 2018 de vraog of e wetholder worden wil. Dat is e nou veur het viefde jaor. Hij giet under meer over economie, wegen, verkeer en duurzaomheid.
„Veural de lokale politiek vin’k mooi. Aj lokaal bezig bint, in je eigen umgeving en met je eigen mèensen, dan kuj echt zien wat aj doet en waor aj het verschil maken kunt”, zeg e.
Hier kom ik weg
Alting
Hij woont met zien vrouw twei jaor in Beilen. Daorveur hef e zien hiele leven in zien geboortehoes in de buurtschap Alting woont, körtbij het dörp. Daor was e de veerde generatie boer. „Ik wol dat eigenlijk pas rond mien 30e worden. Eerst wol ik studeren en wat van de wereld zien, maor het leup aans.”
Zien pap kreg rugklachten. „Ik kreeg de keus: nou boer worden of nooit boer worden. 16 of 17 jaor wa’k toen. Eerst hew nog een jaor een bedriefshulp had, maor de middag toen ik mien vwo-examen klaor had, wa’k boer.”
Tot 2002 is Schipper melkveeholder. Dan gooit e het roer um en giet e wieder in de accountancy. Wal in de agrarische tak. „Dat wark paste mij. Ik har ok an de aandere kaant van de taofel zeten. Dan begriep ie wat mèensen drieft en waor ze as boer drok met bint.”
Vertrouwd
De streektaol, waor e met opgruid is, helpt ok met in het contact met boeren. En ok nou, as wetholder, prat Schipper plat met aandere mèensen as die dat ok doet. „Dat hef iets vertrouwds. En vaak in de emotie of uut enthousiasme gao ik al gauw plat praoten.”
„Waor ik echt trots op bin in Midden-Drenthe? Naoberschap. Der bint veul dingen die aw samen oplost en veur mekaar doet hier. Wij vindt dat hiel gewoon, maor eigenlijk is het wal biezunder.”
Jan Schipper is sinds 2018 wetholder. Foto: archief/Ron de Vos
Zörgen bint er ok. „Wij moet de kommende jaoren veul neie wonings zetten en iederien wil wal neibouw, maor niet bij heur in de veurtuun of de achtertuun. De vraog is: hoe krieg wij mèensen daorin met?”
Esweg
De kommende tied kreg Schipper het ok drok met een fietsplan dat in de maak is en de anpak van wegen. Over de Esweg in zien woonplaots wordt al jaoren zegd dat e anpakt worden moet. Dat giet gebeuren. Hij stiet met stip bovenan zien liest.
Een aander underwarp waor e met gangs wil, is het geven van bekendheid aan de armoederegelingen in Midden-Drenthe. „Alle inwoners moet weten dat ze hulp kriegen kunt van de gemiente. Op allerlei gebieden: van het op orde brengen van de administratie tot het anvraogen van een uutkering of toeslagen.”
