Commissaris van de Keuning Jetta Klijnsma: 'Wij bint mekaar neudig' | Hier kom ik weg

„Ik bin de veerde van vief maagies”, vertelt Jetta Klijnsma. Heur pap en mam preuten underling Drèents, maor zij spraken Nederlands tegen heur kinder. „’Kuj mij de eerpels even geven?’, vrugen ze dan an mekaar. Tegen ons zeden ze: ‘Wil je mij de aardappelen even aangeven?’” Toch prat Klijnsma een goed woordtie Drèents. „Ik mut der altied even inkomen”, glimlacht ze.

Het gezin woonde vrogger an de Karkstraot en har een steenhouwerij an huus. Klijnsma hef der mooie herinnerings an. „Wij muchten achter ’t huus speulen, daor was ruumte genog. Binnen speulden wij vake bordspellegies.”

Tillevisiekieken kwam later pas. „Eerst keken wij tillevisie bij twee dames bij oes in de straote. Later hadden wij der zelf iene.” In heur tienertied vun Klijnsma het mooi um naor theater De Tamboer te gaon. „Prachtig. Dan gungen wij met oeze CJP-pas naor concerten van het Noord Filharmonisch Orkest, mar ok naor Ramses Shaffy.”

De geboren Hoogeveense vindt cultuur belangriek veur jongern. „Der bint veule getalenteerde jonge muzikanten in oeze previncie. Der treedt vake talenten op veurofgaond an Statenvergaderings. Ik viene het belangriek dat zij een podium kriegt.”

In Drenthe wordt hard warkt um jongern ok op het gebied van underwies en warkgelegenheid toekomstperspectief te bieden. „Zo hebbe wij de Thorbecke Academie in Assen, de IT Hub op ’t Hogeveine, de Greenwise Campus in Emmen en de Health Hub in Roon.”

Jongern willen nao heur opleiding geern in heur eigen umgeving an het wark. „In vergelieking mit vief jaor eleden is der nou meer wark. Bij gemienten, waterschappen, bij oes as previncie, mar bijveurbeeld ok in de horeca.” Klijnsma zöt dat jongern zuch ok vrijwillig inzetten veur onze previncie. „Neem nou jongern die actief bint binnen natuurbeheer. Dat is hartstikke mooi.”

Wie hier niet blieven kan of wil en zien heil in de vrömde zöcht, komp nao een paar jaor toch vaak weerum. „In Amsterdam of Rotterdam is het vake hiel aans wonen as hier”, zeg Klijnsma. ‘Gestapeld wonen’ nuumt zij het. „Hier hej dat veule minder. Al die ruumte en dat gruun bij oes is toch fantastisch?”

Klijnsma kwam zölf ok weerum naodat zij 35 jaor in Den Haag woond en warkt har. ,”k vule mij thuus in Den Haag, mar ok hier in Drenthe, waor een lange historie lig.” Daormet doelt ze niet allent op de hunebedden en de Drèentse geschiedenis, maor ok op wat zij leerde in heur jeugd.

„Dat iederiene in de wereld perspectief mut kriegen, heb ik van mien olders mitekregen”, leg Klijnsma uut. Vrogger hadden zij de deur letterlijk lös veur mèensen die het minder hadden en hulp zöchten bij Klijnsma’s olders. „Ik bin de politiek inegaone, umdat ik derveur zörgen wil dat iederiene mit kan doen. Een meinse kan ’t leven niet allent leven. Wij bint mekaar neudig.”

Klijnsma dèenkt dat mèensen zuch niet altied genog realiseren in wat veur „fantastisch democratisch laand wij woont” zoas zij dat zölf zeg. „Zunder democratie deelt een klein antal meinsen de lakens uut. Dat mut wij niet willen. Iederiene mut kunnen mitdeinken en mitpraoten over hoe wij oes laand inricht. Daorum roep ik iederiene op um woensdag 22 november te gaon stemmen veur de Tweede Kamer.”