'Bruggenbouwer' Willy Venema: 'Börk betiekent thuuskommen veur mij' | Hier kom ik weg

„Veurige week zat mien kleinzeun van 8 met een vriendtie bij mij in de auto. ‘Oma, jij bent toch een bruggenbouwer?’ vreug e opiens.” Willy Venema (70) zit an heur keukentaofel en lacht. „Hij vun het een mooi woord schienbaor.”

Venema is zo iene die bij allerlei dingen in het dörp betrökken is, maor daor niet echt met te koop löp. Naor anleiding van het project Wandelen met Wielen, een tweeweekse wandeling veur mèensen die met een rollator loopt of in een rolstoel zit, weur ze tipt as bruggenbouwer bij de gemiente Midden-Drenthe.

Vanwege het 25-jaorig bestaon van de gemiente bint tien van zulke sociaal beweugen inwoners in het zunnegie zet. Dizze zogenuumde bruggenbouwers bint allemaol schilderd deur leden van schildersgroep Drents Portret.

Venema: „Toen schilderes Anneke Leutscher bij mij kwam, dacht ik: dat is niks veur mij. Ik huuf niet zo neudig in de belangstelling. Tot ze zee dat der allent nog maar mannen waren; toen raakte ze bij mij een gevulige snaar. Allent maor mannen, dat vun ik niet kunnen.”

De tien portretten hangt nou in het gemientehoes in Beilen. Willy Venema is te zien an heur keukentaofel met op de achtergrond een prikbord met daorop dingen die ze döt en stukkies oet heur agenda. „Ik vin het hiel mooi worden”, straalt ze.

De in Örvelt geboren Venema woont vanof heur 3e jaor in Börk. Heur mam en de vief kinder mussen zuch samen redden toen heur pap oet de tied kwam. Methelpen hef ze dan ok al vrog leerd. Op een oetstappie van vief jaor hen Noord-Holland nao, waor heur inmiddels overleden man Bertus toen wark kreeg, hef ze altied in Börk woond. „Börk betiekent thuuskommen veur mij.”

As de beide kinder nog klein bint, helpt Venema vaak bij activiteiten op schoel. Ok giet ze in het bestuur van de zwemclub en later döt ze vrijwilligerswark veur de rievereniging. Ze warkt op het postkantoor in Assen en döt later, tot heur pensioen, administratief wark veur KPN Mobiel.

As Börk in 2012 startplaots wordt van de Fiets4Daagse zet ze zuch ok daor een aantal jaor veur in; van routes oetzetten um 5 uur ’s mörgens tot de inschrievings coördineren en de pechhulp ansturen; ze hef der veul schik an.

Wandelen met Wielen, dat ze samen met Welzijn Midden-Drenthe en de Zorgmanege in Börk opzet hef, is een paar jaor leden ontstaon, naor een idee oet Beilen. „Wij doet het nou zu’n twee jaor, elke twee week doet der ongeveer 28 lopers en begeleiders met.”

Ze bedenkt de routes, die altied naor een plek leidt waor koffie drunken wordt. „Dat kan de manege wezen, de voetbalkantine, ien van de kerken, de bibliotheek of een horecazaak. Ik loop zölf nooit met, maor help met de koffie en bin derbij met de auto veur as der calamiteiten bint.” De dielnimmers loopt of rolt zu’n 3 kilometer; een gezond en sociaal gebeuren.

Wieder is Venema elf jaor secretaoris van de Belangenvereniging Dorp Westerbork. „Wij bint nou drok met het schrieven van een dörpsvisie. Daorveur heb wij de Borker 50 bedacht: vieftig inwoners die, verdield over warkgroepen, metdenkt. De grootste wens veur het dörp? Een dörpshoes! Daor is echt behoefte an.”