Albertje Sok oet Börk: 'Of der op het provinciehuus Dreints epraot wordt? As ik der bin wel!' | Hier kom ik weg

„Ik kom van Nei-Baoling en daor bin’k hartstikke trots op”, begunt Albertje Sok (55) het gesprek lachend. Ze woont al jaoren in Börk, maor blef een Nei-Baolingse. Drèents was daor in hoes vrogger de voertaol. „Mien va en moe spreekt allent mar Dreints, dus ik ok. Ik kán wel Nederlands, mar heb altied een Dreintse tongval. Ik deink ok in de streektaal. A’k achter de computer wat an het typen bin, komt het soms veur da’k nao mut deinken over wat het Nederlandse woord veur iets is.”

Het leren giet heur as kind niet zo goed of. „Op de middelbare schoele in Hesseln zat ik alle tussenuren in het haandenarbeidlokaal. Ik was altied creatief bezig; haandwarken, plakken of met klei: ik vun het mooi um dingen te bedeinken en te maken, as het mar met de haanden gebeurde.”

Plat praoten dee ze daor ok. „Ik weur epest en gung een keer naor de directeur, umdat ik verdrietig ware en naor huus wol. Ik zat daor te snöttern tegenover hum en zien secretaresse zat achter mij. In een reünieboek hef hij later eschreven dat e niks verstun van wat ik zee. Hij kwam uut Lelystad. Toen ik snikkend mien verhaal dee, heul de secretaresse, die wal Dreints kun, achter mij papierties umhoog waorop ze in het Nederlands vertaalde wat of ik zee.”

Ze wil hen de kunstacademie, maor in Hoogeveen bint volgens heur olders schoelen zat waor ze oet kiezen kan, dus dat is der niet bij. Het wordt een mbo-opleiding agogisch wark, maor in de sociale sector is gien baan te vinden. Sok beslöt heur vrachtwagenriebewies te halen en döt een chauffeursopleiding waornao ze bij veurmalige gemiente Börk op de strooiauto terecht komt.

Nao een paar jaor komt ze in dienst van de provincie en wordt ze kantonnier, waormet ze verantwoordelijk is veur het beheer en onderhold van wegen. „Dat he’k met hiel veul plezier edaone. Later bin ik onder andere coördinator van de butendienst en de brug- en sluuswachters ewest. Ik warke nog altied bij de provincie, nou as kwartiermaker van het Fixteam, dat langs de deuren giet um meinsen te helpen met energiebesparende maatregeln. Of der op het provinciehuus Dreints epraot wordt? As ik der bin wel.”

Daornaost hef ze heur bedrief, waormet ze under meer schildercursussen en teambuildingsactiviteiten organiseert en sint- en kerstmankostuums verhuurt. In 2010 start ze samen met een vriendin het evenement Stiefkiekn, waorbij het dreit um limtige standbeelden in Börk. „Dat har ik ooit in Arnhem eziene en ik vun het zo mooi! Bij alles wa’k organiseer giet het um het warken met meinsen. Bij het Stiefkiekn is der een hoop volk op de bien met misschien allemaole heur eigen sores, die ze even vergeten kunt. Dat vien ik belangriek.”

Het jaorlijkse Stiefkiekn is een wedstried. Net as de dragqueen-show die Sok veurige week holden hef bij restaurant De Turfsteker. Elf bekende en unbekende Drèentse mannen traden op as drag. Sok mak in heur naoste umgeving met hoe moeilijk lhbtiq+’ers het hebben kunt en wol daor wat met. „Iederiene mut kunnen wezen wie e wezen wil.”