Lenie Lomulder uut Elp maakt rouwstukken met spullegies van de overledene | Hier kom ik weg

Lenie Lomulder is opgruid in Börk en Zwiggel. Thuus in Elp prat zij met heur vriend altied Drèents. „Dat doe ik ok met mien olders.” Ze begunt te lachen. „Maor as mien mamme mij helpt in de zaak, praot wij Nederlands met mekaor. Zodra as wij buten staot en de deur op slot dreit, gaow geliek over op het Drèents.”

Dat zij in het Drèents grootkommen is, vindt Lomulder hartstikke mooi. „As ik met klanten Drèents praot, gef dat veur oes beiden een gevuul van vertrouwen en rust.”

Bij trouwerijen en het ankleden van evenementen, maor veural bij het maken van rouwwark is dat vertrouwen arg belangriek. „Ik maak gien standaard rouwstuk. Naost natuurlijke materialen en varse bloemen verwark ik der spullegies van de overledene in.”

Miesttieds is ze derbij as een uutvaartspreker een gesprek hef met de femilie. „Dat is veur heur prettig, dan huuft ze het maor ien keer te vertellen. Het zörgt der ok vaok veur dat mien rouwwark anslöt op het verhaal dat de spreker bij de uutvaart vertelt.”

De naobestaonden kiezen met Lomulder spullen van de overledene uut veur in het bloemstuk. „Dat bint der vaok zo veul dat ik nou ok de ankleding doe van de ruumtes waor de uutvaort is.”

Ze pakt een boek met foto’s van heur rouwwarken. Ze lat een foto zien van een bloemstuk van varse bloemen, een spiekerboks en roze met blauwe sneakers. Op de volgende bladziede stiet een foto van een rouwstuk waor een bouwwarkie van Lego-steenties in zit. Het is even stil. „Het is soms confronterend daj zien kunt dat het jonge mèensen bint die uut de tied komt.”

Lomulder wil in heur wark zien laoten wie iemand was. Deurdat zij spullen van de overledene gebruukt, komp heur wark mèensen hiel arg an het gevuul. „A’k het rouwwark bij de femilie breng, wordt mèensen soms hiel emotioneel. Het rak mij da’k het verhaol van heur geliefde in mien wark heb kunnen vastleggen.”

Vanuut heur gevuul warken, vindt Lomulder belangriek. „Dan komp het altied goed.” Zij vindt dat dat op opleidings te weinig andacht kreg. „Daorum he’k daor zölf een module over schreven waoruut ik lesgeef bij Terra Next in Grunning.” Heur stagiaires lat zij ok buten de gebaande paden warken. „Ze komt hier mentaal starker vort as dat zij binnenkwamen.” ‘Hier’ is nou nog in Beilen, maor vanof januari verhuust Anders Bloemstyling naor Elp.

Het feit dat dingen in ’t leven aans gaon as daj dèenken, hef Lomulder umaarmd. „In de hiele rechterkaant van mien lichaam he’k 40 procent kracht en gevuul. Dat komp deur zuurstoftekört bij mien geboorte”, leg ze uut. ‘Kop der veur’ is heur motto. Veul oefen bracht heur waor zij nou is.

„Een poos leden har ik veul uutvaarten. Ok in mien eigen kring. Het was mooi um daor mien steentie an bij te dragen, maor het weur mij wel even te veul.” Lomulder prat dan met vriendinnen of zöcht de verstilling op in de natuur. „Ik ben wel iene die een poos op een baankie op de hei kan zitten um de boel te overdèenken”, zeg ze.

„Het is mooi daw in Drenthe in de natuur tot rust kommen kunt. Dan kuj dernao weer wieder.”