Rien de Jong kweekt al meer as 25 jaor kerstbomen. Foto: Boudewijn Benting
„Veur het kweken van kerstbomen bi’j een bult geduld neudig”, zeg de 37-jaorige kerstboomkweker Rien de Jong uut Eksel. „Een boom hef minimaal zes jaor neudig um oet te gruien tot een volweerdige kerstboom.”
„Wij zit nou in de olde koeienstal van mien opa en oma”, zeg de 37-jaorige Rien de Jong over zien kantine. De koppen thee en koffie staon te dampen op taofel en in de koektrommel liggen speculaasbrokken. Binnen is het warm, buten barre kold. De Jong zien mamme Roelie en zien dochter Roos bennen daor ondanks de kolde drok an ‘t wark tussen de kerstbomen.
Tuunbouwschoel
De Jong woonde as kind in Papenvoort en Hesseln en verhuusde daorna met zien pap, mam en zussie naor Eksel. Daor kwam e geern bij zien opa en oma. „In een hoek van heur arf he’k mien eerste boompies plant. Dat weurden der aal meer”, lacht e. Nao zien opleiding an het Terra College gung e hen Frederiksoord. „Daor zat ik op de tuunbouwschoel. Ik leerde daor alles over bomenteelt en kwekerijen.”
Hier kom ik weg
De Jong kocht zuch der nog meer grond bij waorop e kerstbomen begunde te kweken. Vandaog de dag kweekt e zeuven soorten die e verkoopt an particulieren, tuuncentra en hoveniers deur het hiele laand. Zien eigen favoriet? „Veur in hoes de Nordman, die is mooi vol”, zeg De Jong. „Maor um te kweken vind ik een fienspar mooi. Die kuj goed in vorm snuien.”
Schrale grond
„Je möt bedèenken dat het zes tot zeuven jaor duurt veurdat een kerstboom volgruid is. Dat betiekent daj een bult geduld hebben moet aj met een kwekerij begunt”, vertelt e wieder. „Wij hebt verscheiden vakken op de percelen. Op een leeg stuk plant ik neie boompies is. Die bint zo’n 30 tot 40 centimeter hoog.”
Hier kom ik weg
De streektaolrubriek Hier kom ik weg is een samenwarking met het Huus van de Taol en giet over Drenten en heur verhalen. As kandidaten plat praot, wordt ze in heur eigen variant van het Drèents citeerd. Schrievers Jessica Bonnema en Annemiek Meijer gebruukt heur eigen variant: resp. het Zuudoost-Veen- en het Zuudoost-Zaand-Drèents.
De Jong zeg dat de mieste kerstboomsoorten ‘t goed doen op de Drèentse zaandgrond. „De bodem möt eigenlijk wat schraal wezen. Hej ze op een voedingsrieke grond, dan kriej slappe bomen die veuls te rap gruit. Dat is niet mooi.”
Stapels bomen
De kweker snuit de boompies zo’n twee keer in ’t jaor. „Daor kriej mooie volle bomen van”, zeg e. „En as ze groot genog bint, gaow ze in de anloop naor Kerst rooien.”
De Jong: 'Met de kerstdagen much wij van de rust genieten.' Foto: Boudewijn Benting
Rond het bedrief liggen grote stapels met bomen die verpakt bennen in netties. „As een perceel leeg is, maak wij in januari de grond weer in orde. Olde wortels haal wij vort en in april giet de neie anplant derin.”
Spooktocht
De Jong holdt van de saamheurigheid in zien femilie en in ’t dörp. De jeugdsoos van Eksel holdt ieder jaor een spooktocht die ok deur de schuur van de kwekerij giet. „Dat is toch mooi?”, zeg e. „Dan ben ik schminckt, de boel is versierd en ik heb in ’t duuster een rookmachine in de schuur staon.”
Aj hum vragen naor iets typisch Drèents van humzölf lacht e: „As ik ’s aovends in huus kom, zet ik RTV Drenthe an. De hiele aovend. Dan hej uuteindelijk alle programma’s had en koj vanzölf bij het NOS journaal terecht.”
In zien huus staon drie echte kerstbomen. „Mien beide wichter hebt ok elk iene op de slaopkamer staon”, zeg e. „Kerst is veur mij echt een femiliefeest. Wij bint al vanof oktober hiel hard an ’t wark. Met de kerstdagen is dat klaor. Dan much wij van de rust genieten.”
