Bertus Witteveen: 'Ik mag het mèensen graag naor de zin maken' | Hier kom ik weg

De samenwarking tussen de horecaundernimmers in Börk is goed. Vanof dat e in 1999 Diggels overnam, is Bertus Witteveen met zien collega’s gangs west um toeristen naor het dörp te kriegen deur activiteiten te organiseren, zoas markten en festivals. ,,Dat is goed lukt en nou kunw as horeca op goeie dagen, zoas bijveurbeeld Hemelvaortsdag dit jaor, de anvoer van gasten amper an. Dat is echt een luxeprobleem.”

Witteveen zit in de zun op het terras van Diggels. De 61-jaorige horecaman lek Drèents te praoten, maor in wezen in het een mix van het Drèents en het Sallands. Hij komp van Lemelerveld.

Dat e ooit in Drenthe zul gaon wonen, har e vrogger niet kunnen vermoeden. Net as dat e gien profvoetballer worden zul. ,,Alles dreide um voetbal. Dat kun ik aordig. Ik speulde bij de beloftes van PEC Zwolle en op schoel he’k eigenlijk royaal verzaakt. Ik zul ja toch profvoetballer worden? Maor uuteindelijk bin ik weugen en te licht bevunden. Een plan B har ik niet echt.”

Via de zus van een medespeuler komp e bij zalencentrum Reimink in Lemerveld an het wark as glazenhaler. ,,Al gauw mug ik ok bedienen. Dat bevuul zo goed dat ik dacht: ik heb de plank gewoon hielemaol misslaon met mien gevoetbal. Ik vun de horeca zó fantastisch mooi.”

Later begunt Witteveen met twee compagnons een zaak in Ommen. ,,Ik mag het mèensen as gastheer graag naor de zin maken en aj dan markt dat dat lukt, is dat hiel mooi”, zeg e. Nao een aantal jaor wil e veur zuchzölf begunnen. Zien compagnon komp horecaundernimmer Hip Slomp oet Börk tegen, die zien zaak verkopen wil. ,,De volgende dag he’k hum beld en zes week later was het rond.”

Witteveen har daorveur niks met Drenthe. ,,Ik kwam der nooit. Ik wol in Overiessel blieven of richting Gelderland of Braobant. Met Friesland en Grunning har ik niks en Drenthe kende ik hielemaol niet. Ik vun het de grieze provincie van Nederland.”

Dat beeld is rap bijsteld. ,,Ik vuul mij nou ok echt wel een Drent, al blief ik ok altied Overiesselaar”, gniest e. Plat praoten met zien gasten döt e ok, zo gauw as e heurt dat die dat ok doet.

Witteveen hef zuch der veur inzet dat Börk een startplaots veur de Fiets4Daagse worden is, met alle jaoren een groot ontbijt veur de start in het centrum. Ok is e betrökken west bij activiteiten as het jaorlijkse palingroken en het dweilorkestenfestival, die in het verleden holden bint in Börk.

,,Ik bin een kartrekker. Allent de leste twee jaor hef haost alles stilelegen deur corona, maar ik heur um mij hen alweer allerlei plannen en die he’k zölf ok, dus der komt wel weer activiteiten. Ik kan mij der drok um maken a’k mèensen heur zeggen dat het niet goed gaon zul met Börk. Het giet hartstikke goed, allent wij moet bepaalde dingen nei leven inblaozen. Zu’n dweilorkestendag, daor vraogt mèensen nog wel ies naor. Die komp zeker terug.”