Jan Drogt oet Beilen: ‘Ok de gebarentaol hef verschillende dialecten’

Jaorenlang was Jan Drogt (66) eigenaar van Lindhorst Huisvestingsadviseurs in Hoogeveen, dat neibouwprojecten van under meer schoelen en gemientehoezen begeleidt. Hij hef het nou verkocht, maor warkt der nog wal.

Hij is nou drok met de verbouwingsplannen veur het gemientehoes in Exel, maor komp veur zien wark ok veul in Friesland. „Dan ziej de verschillen: daor vergadert ze in het Fries, in Exel praot wij Nederlands. Dat doet de Friezen beter as wij, vin ik. Daor heb ze ok veul meer oog veur de eigen culuur as hier: kaatsen, fierljeppen en skûtsjesilen, dat soort dingen wordt allemaol in ere holden.”

Drogt is een Beilenaar in hart en nieren. Zien pap warkte vrogger bij de Domo en zien mam op de huusholdschoel in het dörp. Tegen de drei kinder preuten ze Nederlands. „Drèents bin ik praoten gaon op voetbal. Mien teamgenoten bij schoelvoetbal en Fit Boys preuten wel plat. Daor he’k het van leerd en ik doe het nog altied. Mien vrouw komp van Hollandscheveld en döt het ok.”

Toen e in 1998 zien bedrief Lindhorst begunde, wol e een naam die linkt was an Drenthe en een beetie sjiek klunk. „Ik dacht an Linthorst Homan, de old-commissaris van de keuningin. Maor Linthorst was een eigennaam, dat mug niet. Daorum he’k der een d in zet.” Hij lacht: „Bleek der in Zuud-Afrika een wienmark te wezen met die naam!”

Lange tied gaf e flessen van dat mark as kedogie an zakenrelaties. Toen zien zeun veur een studie Zuud-Afrika zat, hef Drogt der hen west. „Wat mij opvöl, was dat ik mij daor in het Drèents ok verstaonbaar maken kun tegen mèensen die Afrikaans preuten. Zo he’k hiele gesprekken in de streektaol voerd daor.”

Hij hef naost gespreuken taolen ok nog gebarentaol leerd. „Oeze dochter is doof en heur man en drei kinder ok. Ik bin derachter kommen dat in heur taol ok verschillende dialecten bestaot.”

„Wij hebt de variant van het doveninstituut in Haren leerd, maor in Papendrecht, waor oeze dochter nou woont, gebruukt ze weer aandere gebaren”, vertelt e wieder. „As ik oes gebaar maak van een kop koffie (hij mak met zien iene haand een reur-beweging boven de aander), dan lacht ze me daor uut.”

In zien woonplaots is Drogt actief as veurzitter van de Stichting Stefanuskerk Beilen. Die organisatie regelt allerlei culturele activiteiten in de kark um het ieuwenolde gebouw in ere te holden. „Der bint nog virtig diensten per jaor, inclusief rouw- en trouwdiensten. Wieder hol wij under meer lezingen, concerten en filmaovends. Dat löp hartstikke mooi!”

Dit jaor bestiet het Van Oeckelen-örgel in de kark tweihonderd jaor; een mooie reden um wat themaconcerten te organiseren, bedacht de stichting. „Zo komp in meert het Roder Girl Choristers met de internationaal bekende organist Sietze de Vries en op 5 april hew Sven Figee, bekend van de band Sven Hammond. In het naojaor volgt nog twei concerten.”

Drogt benaodrukt hoe belangriek het is um arfgoed te beholden. „Niet allent um het vastgoed, maor juust vanwege de cultuur-historische weerde. Dat geldt ok veur oeze Drèentse cultuur, vin ik. Die moew koestern. De taol heurt daor ok bij. Wij hebt een verantwoordelijkheid um oeze cultuur te onderholden.”